Լեռնային Ղարաբաղի Հանրապետության մայրաքաղաք Ստեփանակերտում իրավագետ Վլադիկ Ներսեսյանցի 75-ամյակի պատվին գիտական ընթերցումներ են կազմակերպել:
Ընթերցումները կազմակերպել էր Արցախի պետական համալսարանի Ուսանողական գիտական ընկերության նախագահ Ավետիք Հարությունյանը: Վլադիկ Ներսեսյանցը ռուսաստանցի հայտնի իրավաբան է, պետության եւ իրավունքի, իրավունքի պատմության, քաղաքական եւ իրավական ուսմունքների պատմության տեսաբան: Ընթերցումներին մասնակցել են ԼՂՀ ԱԺ նախագահ Աշոտ Ղուլյանը, Գերագույն դատարանի նախագահ Նարինե Նարիմանյանը, արդարադատության նախարար Արարատ Դանիելյանը, դատավորներ, իրավաբաններ, իրավապաշտպաններ:
ԼՂՀ ԱԺ-ի նախագահ Աշոտ Ղուլյանն ընդգծել է ԽՍՀՄ-ի եւ Ռուսասանի հայտնի իրավագետ, գիտնական հայրենակից Ներսեսյանցի աշխատանքներն ուսումնասիրելու կարեւորությունը, որը նոր ճյուղ է հիմնել իրավունքի փիլիսոփայության ոլորտում: Խոսնակը նշել է, որ այդ նույն ազատական արժեքների հիման վրա էլ հռչակվել էր Լեռնային Ղարաբաղի Հանրապետությունը:
ԾԱՆՈԹԱԳՐՈՒԹՅՈՒՆ. Վլադիկ Ներսեսյանցը պետության եւ իրավունքի ազատական-իրավական տեսության եւ ցիվիլիզմի հայեցակարգի հիմնադիրն է: Ժամանակին նա եղել է Սոցիալական եւ իրավական փիլիսոփայության միջազգային կազմակերպության ռուսական մասնաճյուղի նախագահը, «Փիլիսոփայական ժառանգություն» խմբագրական կոլեգիայի անդամ, Նոր փիլիսոփայական հանրագիտարանի համահեղինակ: Իրավաբանական գիտությունների դոկտոր, պրոֆեսոր, ՌԳԱ-ի ակադեմիկոս (2000թ.):