Հայտնի բանաստեղծ Հովհաննես Շիրազի որդու` քանդակագործ Արա Շիրազի առողջական վիճակը շարունակում է մնալ ծայրահեղ ծանր: Այս մասին NEWS.am-ին ասաց Առողջապահության նախարարության գլխավոր անեսթեզիոլոգ-ռեանիմատոլոգ Անատոլի Գնունին:
Արա Շիրազը անգիտակից է եւ միացված է արհեստական շնչառության ապարատին: Բժիշկը նշեց, որ դրական առաջընթաց կարելի է համարել այն, որ որեւէ բացասական բան չկա:
Որեւէ փոփոխություն չկա նաեւ «Նաիրի» բժշկական կենտրոնում գտնվող սպարապետ Վազգեն Սարգսյանի մոր՝ տիկին Գրետայի առողջական վիճակում: Անատոլի Գնունին ասաց, որ նրա վիճակը կայուն է, բայց դեռ չեն կարող Վերակենդանացման բաժանմունքից տեղափոխել այլ բաժանմունք:
Նշենք, որ Արա Շիրազը մոտ 10 օր է՝ գտնվում է «Նաիրի» բ/կ-ում: Նրա մոտ ախտորոշվել է գլխուղեղի ինսուլտ՝ բազմաթիվ տարբեր հիվանդությունների առկայությամբ: Իսկ տիկին Գրետայի մոտ հայտնաբերվել է ուղեղի արյան շրջանառության սուր խանգարում, որն արտահայտվել է իշեմիկ ինսուլտով։ Նա հիվանդանոց էր տեղափոխվել մարտի 4-ին:
