Երկկողմանի եւ միջազգային մի շարք արդիական հարցեր են քննարկվել Ռուսաստանի եւ Իրանի նախագահներ Վլադիմիր Պուտինի եւ Հասան Ռոուհանիի հեռախոսազրույցի ընթացքում: Զրույցը կայացել է իրանական կողմի նախաձեռնությամբ:
Ինչպես հաղորդում է Կրեմլի մամուլի ծառայությունը, զրույցի ընթացքում հաստատվել է երկկողմանի տրամադրվածությունը խորացնել փոխադարձ համագործակցությունը, համաձայնեցված նախագծերի եւ պայմանագրերի հետեւողական իրականացումը: Իրանական միջուկային ծրագրի շուրջ կարծիքներ փոխանակելիս Ռուսաստանի նախագահը դրական է գնահատել Թեհրանի կառուցողական մոտեցումը «վեցնյակի» հետ բանակցությունների ընթացքում:
Հասան Ռոուհանի խնդրանքով Վլադիմիր Պուտինտ գնահատել է Ուկրաինայում ստեղծված իրավիճակը: Ռուսաստանի նախագահն ընդգծել է, մասնավորապես, որ ճգնաժամի կարգավորում հնարավոր է միայն այդ երկրի բոլոր շրջանների բազմազգ բնակչության շահերն ու կամքը հաշվի առնելու դեպքում:
Պայմանավորվածություն է կայացել շարունակել երկկողմանի երկխոսությունը միջազգային եւ տարածաշրջանային խնդիրների շուրջ՝ ներառյալ Կասպիական հերթական գագաթաժողովի նախապատրաստումը:
