Իրանի արտգործնախարարի տեղակալ Աբաս Արաքչին եւ ԵՄ դիվանագիտության ղեկավարի տեղակալ Հելգա Շմիդտը պայմանավորվել են երկու օրվա ընթացքում Իրանի եւ «միջազգային վեցյակի» միջեւ բանակցություններ անցկացնելու մասին, փոխանցում է IRNA-ն: Արաքչին եւ Շմիդտը համաձայնացրել են 2014թ. մարտի 18-ի առավոտյան Վիեննայում մեկնարկող բանակցությունների երկրորդ փուլի օրակարգը:
Միջուկային ծրագրի շուրջ բանակցությունները կսկսվեն Իրանի արտգործնախարար Մուհամադ Ջավադի եւ ԵՄ դիվանագիտության ղեկավար Քեթրին Էշթոնի հանդիպումից:
Նախօրեին Իրանի արտգործնախարար Մուհամադ Ջավադ Զարիֆը չեղյալ էր հայտարարել ԵՄ դիվանագիտության ղեկավար Քեթրին Էշթոնի հետ ընթրիքը՝ ի նշան իրանցի ընդդիմադիրների հետ վերջինիս հանդիպման առթիվ բողոքի: Խոսքը 2009-ի անկարգությունների մեջ մեղադրվող ակտիվիստների մասին է:
2013թ. Թեհրանն ու «միջազգային վեցյակը» պայմանավորվել էին Իրանի միջուկային գործունեության մասնակի դադարեցման մասին՝ երկրի հանդեպ պատժամիջոցները մեղմելու դիմաց: Համաձայնագրի իրագործմանը կողմերը ձեռնամուխ էին եղել 2014-ի հունվարի 20-ից:
Այժմ կողմերը պետք է քննարկեն Իրանի միջուկային ծրագրի վերաբերյալ համապարփակ համաձայնագրի հարցը: