Վրաստանում սկանդալ է հասունանում 2005թ. մահացած Վրաստանի նախկին վարչապետ Զուրաբ Ժվանիայի ու Քվեմո-Քարթլիի տարածաշրջանում նախագահի լիազոր ներկայացուցչի տեղակալ Ռաուլ Յուսուպովի մարմինների լուսանկարները YouTube –ում հայտնվելու կապակցությամբ: «Սահակաշվիլին սպանել է Ժվանիային» մակագրությամբ կոլաժը YouTube-ում տեղադրել է ոմն Հաքիմ Փաշա կեղծանվամբ օգտատերը:
Լուսանկարներում, որոնք հավանաբար արվել են օպերատիվ լուսանկարահանման եւ բժշկական փորձաքննության ընթացքում, կարմիր շրջանակով նշված են Ժվանիայի եւ Յուսուպովի մարմիններին առկա ֆիզիկական վնասվածքները:
Սոցցանցում լուսանկարների հայտնվելը Գլխավոր դատախազությունը հետաքննությանը խանգարելու փորձ է անվանել: Գործը ավարտական փուլում է եւ առաջիկայում արտաշիրմում կկատարվի, քանի որ փորձաքննությունը ոչ լիարժեք է:
Հանգուցյալ վարչապետի եղբայր, «Վրացական երազանքի» պատգամավոր Գեորգի Ժվանիան լուսանկարների իսկության հետ կապված կասկած չունի: Ըստ նրա՝ դրանք քրեական գործից են քաղված: Ժվանիայի եւ Յուսուպովի ընտանիքներն ավելի վաղ հայտարարել էին, որ հետաքննության ընթացքում ձեռք բերված ապացույցները արմատապես փոխում են իրենց հարազատների մահվան պաշտոնական վարկածը:
Նախորդ տարվա հոկտեմբերին Գեորգի Ժվանիան պնդում էր, որ մահվան հանգամանքները կեղծվել էին Սահակաշվիլիի մարդկանց կողմից: Նա ուղղակիորեն մեղադրել էր նախագահ Սահակաշվիլիին եւ նախկին վարչապետ Իվանե Մերաբաշվիլիին, նախկին դատախազին եւ արդարադատության նախկին նախարար Զուրաբ Ադեիշվիլիին, ինչպես նաեւ Հյուսիսատլանտյան ինտեգրման նախկին նախարար Գեորգի Բարամիձեին:
Իր հերթին Վրաստանի վարչապետ Իրակլի Գարիբաշվիլին նախքան կառավարության նիստն սկսելը դեմ է արտահայտվել տվյալ թեմայով «ավելորդ շահարկումներին»: Սակայն նշել է, որ հաշվի առնելով այդ լուսանկարները, կարելի է ասել, որ «վարչապետը վախճանվել է կասկածելի հանգամանքներում»: «Ինձ տեղեկացրել են, որ գլխի հատվածի վնասվածքները եւ արնազեղումը Ժվանիան ստացել էր դեռ կենդանության օրոք», — նշել է վարչապետը:
Նա հույս է հայտնել, որ համացանցում այդ լուսանկարները հայտնվելուց հետո, քննությունն էլ ավելի ինտենսիվ կիրականացվի, եւ որ «շատ շուտով հասարակությունը կիմանա ճշմարտությունը»:
Պետք է նշել, որ շատերն են կասկածում, թե այդ գործն իրսկապես կբացահայտվի:
Հիշեցնենք, որ Ժվանիան եւ Յուսուպովը մահացած էին հայտնաբերվել 2005 թ. փետրվարի 3-ի գիշերը՝ Թբիլիսիի Սաբուրտալինի փողոցի վարձու բնակարանում:
Ըստ պաշտոնական վարկածի, որը հրապարակել էր այն ժամանակ ներքին գործերի նախարար Վանո Մերաբիշվիլին, նրանք մահացել էին գազից թունավորվելու հետեւանքով:
2012թ . Վրաստանի նոր իշխանությունները վերսկսել էին Ժվանիայի եւ Յուսուպովի մահվան հանգամանքների քննությունը: Դա նախկին վարչապետ Բիձինա Իվանիշվիլիի քաղաքական կոալիցիայի նախընտրական խոստումներից մեկն էր:
Մամուլ. Վրաստանի նախկին վարչապետ Զուրաբ Ժվանիան Սահակաշվիլիի աչքի առաջ է սպանվել