Անրի Մատիսի, Պաբլո Պիկասոյի եւ Ֆերնան Լեժեի կտավները Նյու Յորքի Sotheby's աճուրդի թոփ լոտեր կդառնան։
Մայիսի 7-ին կայանալիք աճուրդի մարգարիտը կդառնա Մատիսի 1924թ. Նիցցայում նկարված «Առավոտյան սեանս» կտավը։ Դրանում պատկերված է նկարչի մուսա, նկարիչ Հենրիետա Դարիկարերը, հայտնում է ԻՏԱՌ-ՏԱՍՍ-ը։
Կտավի երկրորդ տարբերակը գտնվում է նյույորքյան մետրոպոլիտեն-թանգարանում։ Սակայն այնտեղ նստած նկարող Դարիկարերի կողքին մերկ բնորդուհի է։ Ակնկալվում է, որ «Առավոտյան սեանս» կտավը կվաճառվի 20-30 մլն դոլարով։
Մեկ այլ ֆավորիտ է Պիկասոյի «Փրկություն» կտավը (1932), որում հանգստացողները փրկում են գետում խեղդվող կնոջը։ Sotheby's-ն ակնկալում է դրանից ստանալ 14-18 մլն դոլար։
Հաջորդ հայտնի ստեղծագործությունը կուբիզմի հիմնադիր Ֆերնան Լեժեի «Երկու ֆիգուրները եւ ծաղիկը» կտավն է՝ արված 1940-ականներին։ Կտավի գնահատված արժեքը 3-5 մլն դոլար է։
Բոլորի երեք կտավները աճուրդի է հանել ԱՄՆ-ից մի հավաքածուատեր, որի անունը չի հաղորդվում։