Արցախի Հանրապետության վարչապետ Արա Հարությունյանն այսօր՝ ապրիլի 4-ին նամակ է հղել Տիգրան Սարգսյանին:
Նամակում, որում մասնավորապես ասված է՝ «Հարգարժան Տիգրան Սուրենի,
Ըմբռնումով եմ գնահատում Ձեր հրաժարականի որոշումը եւ հավատում, որ այսուհետ եւս, անկախ Ձեր զբաղեցրած պաշտոնից ու գտնվելու վայրից, Ձեր գործունեությունը նվիրվելու է մեր ժողովրդի ու պետության շահերին:
Ուզում եմ երախտագիտություն հայտնել Ձեզ մեր 6-ամյա համագործակցության, ուղղակի ասեմ` համատեղ աշխատանքի համար: Պետք է ընդգծեմ, որ անցած այդ տարիները բավական արգասավոր էին ՀՀ կառավարության կողմից Արցախին ցուցաբերվող օժանդակության առումով: ԼՂՀ-ում իրականացված մի շարք կարեւոր ծրագրերում առկա են Ձեր անմիջական մասնակցության շոշափելի հետքերը: Դուք միշտ սրտացավորեն եք հետեւել մեր հանրապետության սոցիալ-տնտեսական զարգացումներին եւ նպաստել, որ դրանք ընթանան դրական առաջընթացով:
Ամենայն հաջողություններ Ձեզ հետագա կյանքում»:
Նշենք, որ ապրիլի 3-ին ՀՀԿ Գործադիր մարմնի նիստից հետո ԱԺ փոխնախագահ Էդուարդ Շարմազանովը լրագրողներին հայտնել էր, թե Հայաստանի վարչապետ Տիգրան Սարգսյանը հրաժարականի դիմում է ներկայացրել: Շարմազանովի խոսքով, վարչապետը դիմումը ներկայացրել էր դեռ մեկ ամիս առաջ, սակայն հաշվի առնելով Մաքսային միության հետ կապված եւ այլ հարցեր, նախագահ Սերժ Սարգսյանը խնդրել էր մեկ ամիս սպասել: Վարչապետի դիմումը բավարարվել է: