Ուկրաինայի հայերի միությունը հայաբնակ սիրիական Քեսաբ քաղաքի վրա հարձակումը դատապարտելու եւ խիստ միջոցներ ձեռնարկելու հորդորով դիմել է միջազգային հանրությանը։
«Բավական ժամանակ է՝ ուշադիր հետեւում ենք Սիրիայում ընթացող իրադարձություններին եւ մշտական կապի մեջ ենք գտնվում այդ երկրում առկա հայկական սփյուռքի հետ՝ հնարավորությունների չափով օգնություն տրամադրելու համար»,- AnalitikaUA.net-ին հայտնել է Ուկրաինայի հայրերի միության նախագահ Վիլեն Շատվորյանը։
Վերջինիս գնահատմամբ՝ այսօր միջազգային հանրության աչքի առաջ Քեսաբը մեր պատմության սարսափելի էջերը կրկին անգամ հիշեցնող ողբերգություն է ապրում։ «Մենք չենք կարող հաշտվել նմանատիպ ճչացող անարդարության հետ»,-ասել է նա։
Հիշեցնենք, որ Ուկրաինայի հայերի միությունը միակ համաուկրաինական կազմակերպությունն է, որ միավորում է այդ երկրում գործող բոլոր հայկական կազմակերպությունները։
Բացի այդ, ՈՒՀՄ-ն Ուկրաինայում առաջին հասարակական կազմակերպությունն էր, որ ԵՄ-ի թափանցիկության ռեեստրի մաս է կազմել, եւ մոտ ապագայում էլ կարող է ուկրաինական հասարակական կազմակերպություններից առաջինը ՄԱԿ-ի տնտեսական եւ սոցիալական խորհրդի խորհրդատու անդամի կարգավիճակ ստանալ։
