Տեղեկատվական պատերազմը Սիրիայի դեմ գաղութային ագրեսիայի ամենավտանգավոր դրսեւորումներից է, հայտարարել է Սիրիայի նախագահ Բաշար Ասադը Դամասկոսի համալսարանի քաղաքական գիտությունների ֆակուլտետի դասախոսական եւ ասպիրանտական կազմի հետ հանդիպմանը:
Սիրիական ՍԱՆԱ գործակալության փոխանցմամբ՝ պետության ղեկավարն ընդգծել է, որ արաբական աշխարհն ի սկզբանե հիմնադրվել է արաբականության եւ իսլամի անքակտելի կապի գաղափարով: Ուստի այս սկզբունքին հետեւելը արաբական պետություններում անվտանգության, գաղափարական եւ սոցիալական կայունության վերականգնման կարեւորագույն գործոններից է: Նրա խոսքով՝ Արեւմուտքը փորձում է բնաջնջել այս գաղափարախոսությունը՝ արաբական տարածաշրջանը վերահսկելու համար: Երբ այդ փորձերը ձախողվեցին, սկսեցին գաղափարախոսության էությունը փոխելուն ուղղված տերմինների աճպարարությունը: Այս առթիվ նախագահն ընդգծել է գիտության եւ մշակույթի գործիչների կարեւոր դերակատարումը:
Նախագահ Ասադը նշել է, որ Սիրիայի վրա հարձակում է իրականացվում ոչ միայն կարեւոր աշխարհաքաղաքական դիրքի պատճառով, այլեւ տարածաշրջանում պատմական կարեւոր դերի եւ արաբ ժողովուրդների վրա մեծ ազեցության համար: «Այն, ինչին այսօր ենթարկվում է Սիրիան, նրա ինքնիշխանությունը քայքայելու եւ երկիրը թուլացնելու փորձ է, որպեսզի ստիպեն հանուն ԱՄՆ-ի եւ Արեւմուտքի շահերի փոխել քաղաքական ուղղությունը: Դրանով է բացատրվում իսրայելական գործոնի ի հայտ գալը` զինված ահաբեկչական խմբավորումներին աջակցելիս: Սիրիայի ճգնաժամում բեկումնային պահ է. բանակը եւ զինված ուժերը շարունակում են հաջաղություններ գրանցել ահաբեկչության դեմ պայքարում, իսկ սոցիալական պլանում ընդլայնվում է ազգային հաշտեցման գործընթացը եւ աճում հակասիրիական ագրեսիայի իրական նպատակների ընկալումը ժողովրդի կողմից: Իշխանությունները ձգտում են վերականգնել անվտանգությունը եւ կայունությունն այն շրջաններում, որոնք ենթարկվել են ահաբեկիչների հարձակումներին, որպեսզի այնուհետ ձեռնամուխ լինեն ահաբեկչության օջախների ոչնչացմանը», - ընդգծել է Բաշար Ասադը:
