Երեւանի քաղաքապետ Տարոն Մարգարյանը, անդրադառնալով քաղաքապետարանի եւ վարչական շրջանների աշխատակազմերի համապատասխան կառուցվածքային ստորաբաժանումների եւ քաղաքապետարանի ենթակայության կազմակերպությունների գործունեության վերաբերյալ ներկայացվող եռամսյակային հաշվետվություններին, ընդգծել է, որ պետք է մանրամասնորեն ներկայացվեն հաշվետվու ժամանակահատվածում կատարված աշխատանքների հաշվետվությունն ու ըստ այդմ նաեւ խիստ հսկողություն սահմանել ծրագրված աշխատանքները ողջ ծավալով իրականացնելու ուղղությամբ : Այդ մասին հայտնում են Երեւանի քաղաքապետարանի տեղեկատվության եւ հասարակայնության հետ կապերի վարչությունից:
«Համայնքային բյուջեից ֆինանսավորվող կազմակերպությունների գործունեության նկատմամբ մենք պարտավոր ենք խիստ հսկողություն սահմանել, ու հատկապես խստորեն վերահսկել ֆինանսական մուտքերն եւ ծախսերը, որպեսզի հասկանալի լինի, թե որքանո°վ են կարողանում ապահովել տարեկան նախանշված ցուցանիշները:
Մեզ համար պարզապես անընդունելի է, երբ համայնքային բյուջեից գումարներ ենք հատկացնում այս կամ այն ոլորտում նախատեսված աշխատանքների իրականացման համար, սակայն տարեվերջին որոշ կազմակերպություններ հաշվետվություններ են ներկայացնում, որ պարտքեր ունեն: Մինչդեռ ունենք նաեւ կազմակերպություններ, որոնք ոչ միայն պարտքեր չեն կուտակում, այլեւ կարողանում են տարին փակել որոշակի տնտեսումներով: Եվ հատկապես այս տեսանկյունից մենք պետք է լրջորեն ուսումանասիրենք մեր ենթակայության այն կառույցների աշխատանքը, որոնք պարտքեր են կուտակում, եւ փորձենք հասկանալ, թե ինչի արդյունք է այն: Ըստ այդմ, պետք է վերլուծենք տվյալ կառույցներում իրականացվող աշխատանքի արդյունավետությունն ու անհրաժեշտության դեպքում նաեւ վերանայենք տվյալ աշխատանքների պատասխանատուների հետ աշխատանքը շարունակելու նպատակահարմարությունը»,- ընդգծել է Տարոն Մարգարյանը: