Հայաստանի սփյուռքի նախարարի պաշտոնակատար Հրանուշ Հակոբյանը եւ Համաշխարհային հայկական կոնգրեսի եւ Ռուսաստանի հայերի միության նախագահ Արա Աբրահամյանը ապրիլի 14-ին ստորագրել են ՀՀ սփյուռքի նախարարության, «Համաշխարհային հայկական կոնգրես» հայկական հասարակական միավորումների միջազգային միության, «Ռուսաստանի հայերի միություն» համառուսաստանյան հասարակական կազմակերպության միջեւ համագործակցության հուշագիր:
Նախարարության մամուլի ծառայությունից հայտնում են, որ Հրանուշ Հակոբյանը բարձր է գնահատել Համաշխարհային հայկական կոնգրեսի եւ Ռուսաստանի հայերի միության հետ արդյունավետ համագործակցությունը եւ նշել, որ այս հուշագիրը երկրորդն է կողմերի միջեւ:
Նախորդ 5 տարիների ընթացքում նրանք ակտիվ մասնակցություն են ունեցել սփյուռքի նախարարության ծրագրերին: Այժմ համագործակցության շրջանակն ընդլայնելու անհրաժեշտություն է առաջացել: Հրանուշ Հակոբյանը նշել է, որ կատարելով ՀՀ նախագահի հանձնարարությունը՝ ակտիվացնել համագործակցությունը համահայկական կառույցների հետ, սփյուռքի նախարարությունն այսօր ավելի բարձր մակարդակի է բարձրացնում համագործակցությունը համահայկական ամենախոշոր կառույցներից մեկի հետ:
Կարեւորելով Հայաստան-Սփյուռք գործակցությանն աջակցումը, հայ ազգային ինքնության պահպանումն ու ամրապնդումը Սփյուռքում, ուծացման կանխարգելումը, ինչպես նաեւ հայոց ցեղասպանության 100-րդ տարելիցին նվիրված նախապատրաստական աշխատանքների իրականացումը՝ հուշագրով կողմերը նախատեսում են համատեղ ծրագրեր իրականացնել մշակութային, գիտակրթական ոլորտներում, համայնքների զարգացման, Սփյուռքում պատմամշակութային ժառանգության պահպանման ոլորտներում:
Համագործակցության շրջանակներում հայկական կրթական ծրագրեր կիրականացվեն Սփյուռքի հայկական ազգային կրթական կառույցներում, մեկօրյա (կիրակնօրյա) դպրոցներում, մշակութային եւ մանկապատանեկան ստեղծագործության կենտրոններում: Նախատեսվում է Սփյուռքի հայկական դպրոցներին ապահովել ուսումնական եւ ուսումնաօժանդակ գրականությամբ, իրականացնել ուսանողների փոխանակման ծրագրեր, Սփյուռքի մտավոր ներուժի բացահայտման նպատակով ՀՀ ԳԱԱ-ի, ստեղծագործական, մասնագիտական միությունների հետ համատեղ կազմակերպել մասնագիտական համաժողովներ, կլոր սեղաններ, հավաք-հանդիպումներ:
Համայնքային կառույցներին աջակցելու նպատակով մշակվելու եւ իրականացվելու են համատեղ ծրագրեր՝ ուղղված հայկական համայնքների ինքնակազմակերպման ու կայացման հիմնախնդիրների լուծմանը, միջհամայնքային համագործակցության ամրապնդմանը:
Կողմերը վերահաստատում են պատրաստակամությունը՝ շարունակել համագործակցությունը «Հայապահպանության գործում նշանակալի ավանդի համար» համահայկական ամենամյա մրցանակաբաշխության իրականացման գործում: