Բարենցի ծովում գտնվող Կոլգուեւ կղզու վրա գտնվող «Կոլուգեւ» գյուղատնտեսական արտադրական կոոպերատիվում ավելի քան 900 եղջերու է սատկել: Այս մասին հաղորդում է Ինտերֆաքսը՝ վկայակոչելով Նենեթական ինքնավար մարզի ղեկավարության մամուլի ծառայությունը:
Կոոպերատիվի գլխավոր անասնաբույժի խոսքով՝ անկման հիմնական պատճառը կենդանիների հյուծումն է եղել, որը արոտավայրերի նվազման արդյունք է:
Մարզի ղեկավարությունում ընդգծում են, որ կոոպերատիվում անասունների գլխաքանակը գերազանցել է նրանց կերակրելու հնարավորությունը: Կենդանիների պոպուլյացիան աճել է վերջին հինգ-յոթ տարիների ընթացքում:
Ինչպես նշվում է, սա այդ կղզում եղջերուների անկման առաջին դեպքը չէ: Նախորդ տարվա գարնանը հյուծվելու արդյունքում այնտեղ հինգ հարյուր կենդանի էր սատկել:
