Ղրիմի բռնակցումն ամենից առաջ Ռուսաստանին է վնասում՝ քայքայելով երկրի տնտեսությունը եւ Արեւմուտքում նրա դեմ հակառակորդների համախմբելով:
Forbes-ում հրապարակված հոդվածում նման տեսակետ է հայտնել Լեքսինգտոնի ինստիտուտի հիմնադիր, նախկինում Ջորջթաունի համալսարանի դասախոս Լորեն Թոմփսոնը:
Թոմփսոնը Մոսկվայի համար նման գործողությունների 5 բացասական հետեւանք է առանձնացնում: Նախ, ըստ նրա, Ռուսաստանի տնտեսությունը, որը «ԱՄՆ-ի եւ ԵՄ-ի տնտեսությունների մեկ տասներորդն է», շարունակում է թուլանալ:
Նա նշում է, որ ԱՄՀ-ն այս ամիս Ռուսաստանի 2014թ. տնտեսական աճի կանխատեսումը 2%-ից նվազեցրել է մինչեւ 1,3%-ի: ԱՄՀ-ն նախազգուշացրել է, որ պատժամիջոցների շարքը կարող է տնտեսապես հարվածել Ռուսաստանին եւ նախկին Խորհրդային միության երկրներին:
Երկրորդ հերթին, կարծում է փորձագետը, ռուսական գազի հիմնական գնորդ ԵՄ-ն սկսել է այլընտրանքային աղբյուրներ փնտրել էներգամատակարարումների համար:
«Եվրոպան բնական գազի 30%-ն ստանում է Ռուսաստանից, սակայն տեսնելով, որ Պուտինն անցյալում արդեն օգտագործել է մատակարարումն անջատելու սպառնալիքը՝ որպես քաղաքական ազդակ, այժմ եվրոպացիները վախենում են, որ իրենք խոցելի կլինեն, եթե էներգիայի այլ աղբյուրներ չգտնեն», - նշվում է հոդվածում:
Միեւնույն ժամանակ ԱՄՆ-ն այժմ սկսել է եռանդով յուրացնել Եվրոպան: Ավելին, Ղրիմում Ռուսաստանի ագրեսիան կասկածի տակ է դնում ԱՄՆ-ի միջուկային ներուժի կրճատման նկատվող միտումը:
«Մոսկվային այժմ սպառնում է ամերիկյան թարմացված միջուկային ներուժին բախվելու հեռանկարը», - նշում է վերլուծաբանը:
Ըստ նրա՝ Ղրիմը բռնակցելու եւս մեկ հետեւանք է ՆԱՏՕ-ի աշխուժացումը: «Վլադիմիր Պուտինն ավելի շատ բան արեց դաշինքի համերաշխությունն ամրապնդելու համար, քան ամերիկացի պաշտոնյաների երկու տասնամյակ շարունակվող ճառերը», - նշել է Թոմփսոնը:
Փորձագետը կարծում է, որ Պուտինը Ղրիմի բռնակցումը ծրագրելիս հաշվի չի առել այս բոլոր հետեւանքները:
«Հավանաբար, Պուտինը մտածել է, որ Ղրիմն այնքան փոքր է եւ այնքան մոտ տանը, որ Արեւմուտքի արձագանքը հարաբերական մեղմ կլինի: Դրա փոխարեն նա բախվեց արեւմտյան երկրների կտրուկ արձագանքին, որը բացասական կազդի ռուսական տնտեսության, անվտանգության վրա», - նշել է Թոմփսոնը, փոխանցում է «Ուկրաինսկայա պրավդան»:
