Արգենտինայում դատում են նախկին զինվորականների, որոնք մեղադրվում են բռնապետության տարիներին (1976-1983թթ.) մարդու իրավունքների խախտումների մեջ, հայտնում են արգենտինյան լրատվամիջոցները:
Այս անգամ ամբաստանյալի աթոռին ռեժիմի ընդդիմադիր Օսվալդո Բենեդետիի սպանության կասկածյալ մի քանի զինվորականներ են: Բենեդետին ձերբակալվել էր իշխանության դեմ հանցավոր պայմանավորվածության գալու մեղադրանքով, այնուհետ մահացել էր իբրեւ թե բանտապահի հետ կռվի հետեւանքով: Իրականում ենթադրվում է, որ նրան մահապատժի են ենթարկել առանց դատ ու դատաստանի, հայտնում է ԻՏԱՌ-ՏԱՍՍ-ը:
Հատկանշական է, որ քննությունը որոշել է գործում որպես կասկածյալ չներգրավել ռազմական խունտայի նախկին գեներալ Լուսիանո Մենենդեսին: Նա արդեն յոթ ցմահ ժամկետի է դատապարտվել` ռազմական վարչակարգի ժամանակաշրջանում մադկանց առեւանգումների, տանջանքների եւ սպանությունների համար: Նախկին գեներալը մասնակից է դատական երկու գործերի եւս` կապված բռնապետության հանցագործությունների հետ:
1976 թ. մարտի 24-ին Արգենտինայում իշխանությունը զավթել էին զինվորականները` գեներալ Խորխե Ռաֆայել Վիդելայի գլխավորությամբ: Ցրվել էր խորհրդարանը, պարետային ժամ էր հայտարարվել, դադարեցվել քաղաքական կուսակցությունների եւ արհմիությունների գործունեությունը, սկսվել էին ճնշումները: Ըստ պաշտոնական տվյալների` Արգենտինայում բռնապետության տարիներին անհետ կորել է 18 հազար քաղաքացի: Ըստ իրավապաշտպանական կազմակերպությունների տվյալների` այդ թիվը հասնում է 30 հազար մարդու: