Երեւանի Քանաքեռ-Զեյթուն համայնքների ընդհանուր իրավասության դատարանում այսօր՝ ապրիլի 16-ին, ժամը 14։30-ին նախատեսված՝ պահեստազորի գնդապետ Վոլոդյա Ավետիսյանի գործով դատական նիստը սկսվեց 20 րոպե ուշացումով, քանի որ ամբաստանյալին ուշ էին բերել դատարան։
NEWS.am-ի թղթակիցը հաղորդում է, որ դահլիճն ինչպես միշտ լի է ազատամարտիկներով, որոնք եկել են աջակցելու իրեն մարտական ընկերոջը։ Նրանք Վոլոդյա Ավետիսյանին դիմավորեցին ծափահարություններով եւ «ազգի հերոս» վանկարկումներով։ Գնդապետը սեւ շապիկով է, որի վրա սպիտակ տառերով գրված է. «Ռեժիմ, ես հայ եմ, սպանիր ինձ»։ Դատարանի առջեւ ամրացված է Վոլոդյա Ավետիսյանի նկարով եւ նրա անհապաղ ազատ արձակումը պահանջող պաստառ։
Հիշեցնենք, որ Վոլոդյա Ավետիսյանը ձերբակալվել է սեպտեմբերի 20-ին խարդախության կասկածանքով: Վոլոդյա Ավետիսյանը ըստ մեղադրական եզրակացության, հանդիսանալով պահեստազորի գնդապետ,խարդախությամբ հափշտակություն կատարելու ուղղակի դիտավորությամբ,կաշառք ստանալու պատրվակով, չարաշահելով իր՝ որպես նախկին զինվորական ծառայողի նկատմամբ Երևան քաղաքի բնակիչ Ալբերտ Ալեքսանդրի Մաթոսյանի մոտ ձևավորված վստահությունը և դիմելով խաբեության,թե զինվորական բարձրաստիճան պաշտոնատար անձանց միջոցով կարող է կարգավորել ԼՂՀ պաշտպանության բանակի թիվ N զորամասում ժամկետային զինվորական ծառայության նշանակված Ալբերտ Մաթոսյանի որդի Արթուր Մաթոսյանին նույն զորամասում համակարգչային օպերատոր նշանակելու հարցը,սակայն չունենալով նման պայմանավորվածություն, 2013թ.հուլիսի 29-ին ժամը 14:00-ի սահմաններում Երևան քաղաքի Թումանյան 54 հասցեում գտնվող Ալեքսանդր Սպենդիարյանի անվան օպերայի և բալետի ազգային թատրոնի հարակից Ազատության հրապարակի տարածքում Ալբերտ Մաթոսյանից պահանջել է դրա դիմաց իրեն տրամադրել զգալի չափերի՝ 205.150 ՀՀ դրամին համարժեք 500 ԱՄՆ դոլար գումար,սակայն Ալբերտ Մաթոսյանը հրաժարվել է օգտվել Վոլոդյա Ավետիսյանի ծառայությունից, որի պատճառով վերջինս իր կամքից անկախ հանգամանքներով հանցագործությունն ավարտին չի կարողացել հասցնել:
Վոլոդյա Ավետիսյանն իրեն մեղավոր չի ճանաչում։ Նա եւ իր մարտական ընկերները պնդում են, որ սա քաղաքական հետապնդում է, որի պատճառը պահեստազորի գնդապետի հասարակական գործունեությունն է. հիշեցնենք, որ Վոլոդյա Ավետիսյանն էր ղեկավարում անցած տարի սկսված՝ ազատամարտիկների սոցիալական վիճակի բարելավում պահանջող բողոքի արշավը։
