Իրան-Ադրբեջան երկաթուղին Իրան-Հայաստանի նախագծի հանդեպ հետաքրքրվածությունը չի վերացնում, NEWS.am-ի թղթակցի հետ զրույցում ասել է «Ռուսական երկաթուղիներ» ընկերության առաջին փոխնախագահ Ալեքսանդր Միշարինը:
Իրան-Հայաստան երկաթուղու նախագիծը, ըստ Միշարինի, տեղավորվում է «Հյուսիս-Հարավ» տրանսպորտային միջանցքի զարգացման հայեցակարգում: Անգամ Քազվին-Ռեշտ-Աստարա (Իրան-Ադրբեջան) երկաթուղու կառուցման ավարտից հետո «Հյուսիս-Հարավ» ուղղությամբ այլընտրանքային երթուղիներ կպահանջվեն, հավելել է Ալեքսանդր Միշարինը:
Հարցին, թե կպահպանի արդյոք «ՌԵ»-ն հետաքրքրությունը «Իրան-Հայաստան» նախագծի ֆինանսավորման նկատմամբ, Միշարինը հիշեցրել է, որ նախագծի բիզնես-պլան չկա: Այստեղ աշխատանք է սպասվում նախագծի նախաձեռնող կողմից: «Դրա հիման վրա էլ մենք մասնակցության որոշում կկայացնենք: Սակայն ներուժով մենք պատրաստ ենք», - նշել է նա:
Հիշեցնենք, որ Քազվին-Ռեշտ-Աստարա երկաթուղին կառուցվում է 2006 թ.-ից եւ պետք է բացվեր 2013թ. դեկտեմբերին: Այն ժամանակ Իրանի տրանսպորտի վարչության ենթակառույցների զարգացման հանձնաժողովի տնօրենի տեղակալ Հուսեյն Նարդարը հայտարարել էր, որ նախագծի ավարտը հետաձգվում է մեկ տարով:
Իրան-Հայաստան երկաթուղու շինարարության արժեքը կազմում է 3.5 միլիարդ դոլար: Շինարարության ժամկետը կկազմի 6 տարի, հուսալիությունը` 28, շահագործումը` 50: Աշխատանքները նախատեսվում է սկսել 2015թ. առաջին քառորդում: Ենթադրվում է, որ ճանապարհի հայկական կողմի երկարությունը կլինի 316 կմ: