Ռուսաստանի Քննչական կոմիտեն քրեական գործ է հարուցել Դաղստանի ժողովրդական պատգամավոր, խորհրդարանի բյուջետային հանձնաժողովի փոխնախագահ Մուսա Իսլավովի սպանության փաստով:
Հաղորդվում է, որ հարձակումը կատարվել է ժ. 8:00-ի սահմաններում՝ Խասավյուրտի ծայրամասային Բաթայուրտի մայրուղում:
«Նրա Lexus մեքենայի վրա կրակել էին առնվազն երկու ինքնաձիգներից: Պատգամավորը տեղում մահացել էր, վարորդը ծանր վիրավոր է: Հանցագործները փախել էին «Պրիորով», նրանք հետախուզվում են», — հայտնում է «Ինտերֆաքսը»` վկայակոչելով հանրապետության ՔԿ-ի քննչական վարչության ներկայացուցչին:
«Դեպքի վայրից ինքնաձիգի 5,45 եւ 7,62 տրամագծով փամփուշտներ են առգրավվել: Քրեական գործ է հարուցվել»,— հայտնում է գործակալությունը:
Ավելի ուշ հայտնի էր դարձել, որ սպանված պատգամավորի վարորդը վախճանվել է հիվանդանոցում:
«Բժիշկները չէին կարողացել փրկել վարորդի կյանքը: Նա մահացել էր ստացված բազմաթիվ վնասվածքներից», - հայտնել է Դաղստանի ՆԳՆ-ի մամուլի ծառայության ներկայացուցիչը:
