Ռուսաստանում IPTV-ով քչերն են ընդդիմադիր ալիքներ դիտում, հայտարարել է SPB TV-ի գլխավոր տնօրեն Կիրիլ Ֆիլիպովը ապրիլի 17-ին Երեւանում IPTV ծառայության շնորհանդեսի ժամանակ:
SPB TV-ի պլատֆորմով տրամադրվող ծառայությունը հեռուստացույցների հետ աշխատում է ինչպես HDMI-ով, այնպես էլ համանման մուտքով՝ հեռուստացույցին մացվող սարքի օգնությամբ: Սարքը մալուխով կամ Wi-Fi-ով միանում է բաժանորդի DSL մոդեմին:
Հարցին, թե Ռուսաստանում IP հեռուստադիտողների շրջանում տարածված են արդյոք ընդդիմադիր հեռուստաալիքները, ինչպես Հայաստանում, Ֆիլիպովը պատասխանել է. «Մենք ուսումնասիրում ենք, թե մեր բաժանորդներից ով ինչ հեռուստաալիք է դիտում, այդ թվում նաեւ այդ տեսանկյունից: Կարող եմ ասել, որ բավականին աղմոկ կա դրանց շուրջ, սակայն լսարանը բավական փոքր է: Հենց այդ պատճառով էլ մեզ հետ աշխատող օպերատորները միշտ չէ, որ ընդգրկում են դրանք իրենց առաջարկություններում», - նշել է Ֆիլիպովը:
«ԱրմենՏել»-ի բազային փաթեթն ընդգրկելու է 50 հեռուստաալիք: «Ընդ որում` դրանք ոչ միայն վարկանշային են, այլեւ բազմազան: Դրանք են «Euronews»-ը, «France 24»-ը, «Ռոսիա 24» -ը, այսինքն` ոչ միայն ռուսական լուրեր, այլեւ` արեւմտյան, որը բաժանորդին հնարավորություն կտա բազմազան տեղեկություն ստանալ», - նշել է Ֆիլիպովը: Իհարկե, դրանք կարելի է նաեւ համացանցով դիտել, սակայն հարցն այն է, թե որքան է դա հարմար եւ չի ընդհատվի արդյոք ազդանշանը, հավելել է նա:
SPB TV – ն IT-ծրագրիր է` տարբեր սարքերում (բջջային հեռախոսներ, պլանշետներ եւ այլն) հեռուստատեսություն եւ տեսագրություններ հեռարձակելու համար: Ռուսաստանում ընկերությունն արդեն երկար ժամանակ համագործակցում է բջջային օպերատորների «մեծ եռյակի» հետ: