Միացյալ Նահանգներն Ուկրաինային հավելյալ ռազմական օգնություն կցուցաբերեն, որը ներառելու է զենք ու սպառազինությունների մարտական համակարգեր: Ինչպես հաղորդել է Պենտագոնի ղեկավար Չաք Հեյգելը, այս մասին որոշումն ընդունել է ԱՄՆ-ի նախագահ Բարաք Օբաման:
Հեյգելի խոսքով՝ նա այդ մասին հեռախոսազրույցի ընթացքում արդեն տեղեկացրել է ուկրաինացի գործընկեր Միխայիլ Կովալին, ում մարտի 23-ին Գերագույն Ռադան նշանակել է պաշտպանության նախարարի պաշտոնակատար: ԱՄՆ-ի լրացուցիչ օգնությունն Ուկրաինայի զինված ուժերին «մահացու բնույթ» չի կրում, նշել է պաշտպանության նախարարը, հաղորդում է ԻՏԱՌ-ՏԱՍՍ-ը:
«Մատակարարումը ներառելու է Ուկրաիայի զինված ուժերի համար դեղամիջոցներ, սաղավարտեր, ներքնակնեւր եւ ջրի մաքրման սարքավորումներ, ինչպես նաեւ ուկրաինական սահմանապահ ծառայության համար վրաններ, էլեկտարական մարտկոցներ եւ վառելանյութ մղելու պոմպեր»,- հստակցրել է Պենտագոնի ղեկավարը՝ Վաշինգթոն ժամանած Լեհաստանի պաշտպանության նախարար Տոմաշ Սեմոնյակի հետ բանակցություններից հետո կայացած մամուլի ասուլիսի ժամանակ:
Հեյգելը նաեւ հայտարարել է, որ «Միացյալ Նահանգները շարունակում են ուսումնասիրել այն հարցը, թե այլ կերպ ինչպես կարող են օգնել Ուկրաինային»:
Հիշեցնենք, որ ավելի վաղ ԱՄՆ-ն Ուկրաինայի զինծառայողներին էր ուղարկել մոտ 300 հազար պարենային ծանրոց:
