Ամերիկացին, որն իր հասուն կյանքի մեծ մասը բանտում է անցկացրել, ապրիլի 17-ին հերթական պատժաչափն է ստացել, որին ձգտում էր միտումնավոր:
Բանտից դուրս գալուց հետո 74-ամյա Ուոլթեր Ունբեհաունը տառապում էր ձանձրույթից եւ մենակությունից: Նա որոշել էր բանտ վերադառնալ, որը, իր խոսքով, հարազատ տունն է դարձել: Նա բանկ էր ներխուժել, գանձապահին վախեցրել ատրճանակով, եւ գնացել մոտակա հյուրանոց` սպասելով ոստիկանության ժամանելուն:
Դատարանում նա հաստատել էր, որ կարոտել է բանտը եւ ցանկանում է այնտեղ վերադառնալ: Դատավորը բավարարել է նրա ցանկությունը եւ դատապարտել 3,5 տարվա ազատազրկման:
Մեկնաբանելով դատարանի որոշումը` դատախազն ասել է, որ դատավորը երկընտրանքի առաջ է կանգնած եղել. մի կողմից, մեղադրյալն ստացել էր այն, ինչի ձգտում էր, այսինքն` բանտարկությունը նրա համար ոչ թե պատիժ էր, այլ պարգեւատրում: Մյուս կողմից էլ`դատավորն այլ կերպ չէր կարող վարվել, քանի որ Ունբեհաունը կարող էր դիմել ավելի ծանր հանցագործության, դատախազի խոսքերն է մեջբերում BBC-ի ռուսական ծառայությունը:
