ԱՄՆ-ի Յուտա նահանգի բնակչուհի Մեգան Հանթսմենը, որը կիրակի ձերբակալվել էր սեփական վեց երեխաների սպանելու կասկածանքով, խոստովանել է հանցանքը, հայտնում է AP-ը:
Ըստ ոստիկանության` Հանթսմենը հայտարարել է, որ 1996-2006թթ. ընթացքում յոթ երեխա է ունեցել, որոնցից մեկը մահացած էր ծնվել: Նա խոստովանել է, որ մյուսներին սպանել է ծնվելուց անմիջապես հետո, նշվում է ոստիկանության հայղորդագրության մեջ, փոխանցում է «ՌԻԱ Նովոստին»:
Հանթսմենին ձերբակալել են, երբ ոստիկանություն է դիմել նրա նախկին ամուսին Դարեն Ուեսթը, որը վերջերս էր դուրս եկել բանտից, որտեղ գտնվում էր թմրանյութեր պահելու համար: Ուեսթը վերադարձել էր Փլեզանթ Գրուվ քաղաքի իր տուն, որտեղ մինչ այդ բնակվում էր նախկին կինը: Ավտոտնակը մաքրելիս նա երեխայի դիակ էր հայտնաբերել, ինչի մասին անմիջապես տեղեկացրել էր ոստիկանությանը: Ոստիկանները կարծում են, որ Ուեսթը չի իմացել սպանությունների մասին:
Կնոջը պաշտոնական մեղադրանքներ դեռ չեն ներկայացրել: Նա կալանավորվել է եւ գտնվում է Յուտա նահանգի բանտում: Ոստիկանությունը փորձում է պարզել Հանթսմենի արարքի դրդապատճառները:
