ԱՄՆ-ի կողմից Հայոց ցեղասպանությունը ճանաչման փորձերը 20-րդ դարի առաջին ցեղասպանությունը ընդամենը գործիքի վերածել է: Այս մասին ապրիլի 18-ին ամենամյա հաշվետու մամուլի ասուլիսում հայտարարել է Ցեղասպանության թանգարան-ինստիտուտի տնօրեն, Հայոց ցեղասպանության 100-ամյա տարելիցի միջոցառումները համակարգող պետհանձնաժողովի քարտուղար Հայկ Դեմոյանը:
Ըստ նրա` նման փորձեր անցյալում բազմիցս են արվել: Դեմոյանն ընդգծել է, որ դրանց նպատակն է միայն մեր խնդիրը որպես միջոց օգտագործել` կարճաժամկետ կամ երկարաժամկետ խնդիրները լուծելու նպատակով: «Արդյոք դա մեզ պետք է: Արժե՞ ուրախանալ, որ մեր ողբերգությունը մեծ քաղաքականությունում մանրադրամի է վերածվել: Կարծում եմ` ոչ», - նշել է Հայկ Դեմոյանը: Նա հավելել է, որ Թուրքիան տարածաշրջանում ԱՄՆ-ի գլխավոր դաշնակիցներից է, այդ կարգավիճակը չի փոխվի, համապատասխանաբար էլ` չպետք է փոփոխություններ սպասել նաեւ Հայոց ցեղասպանության հարցում:
Հիշեցնենք, որ ԱՄՆ-ի Սենատի արտաքին հարաբերությունների հանձնաժողովն ապրիլի 10-ին ընդունել էր Հայոց ցեղասպանության ճանաչման վերաբերյալ բանաձեւի նախագիծը: