Օրերս Հայաստանի պաշտպանության նախարար Սեյրան Օհանյանի հրամանով պահեստազորի մայոր Սամվել Արտեմի Աբրահամյանը հայ սպային վայել օրինակելի արարքի եւ ազնվության համար պարգեւատրվել է «Գարեգին Նժդեհ» գերատեսչական մեդալով:
ՊՆ մամուլի ծառայությունից հայտնում են, թե Սամվել Աբրահամյանը մարտի 7-ին ՀՀ ոստիկանության շենքի հարեւանությամբ փողոցում գտել է ոստիկանության աշխատակցի ծառայողական վկայական, անցագիր, բանկային քարտեր եւ 220.000 ՀՀ դրամ: Անձնական նախաձեռնությամբ պարզելով դրամապանակի տիրոջ կոնտակտային տվյալները, Սամվել Աբրահամյանը կապ է հաստատել նրա հետ եւ վերադարձրել ամբողջ գտածոն:
ՊՆ-ն նշում է, թե, անշուշտ, պահեստազորի մայոր Սամվել Արտեմի Աբրահամյանը արժանի է բարձր գնահատանքի եւ նրա արարքը խոսում է առհասարակ հայ սպային հարիր օրինակելի վարքագծի եւ մարդկային բարձր որակների մասին: