Ինդոնեզիայում քրիստոնեական ծեսի մասնակիցներով նավ է շրջվել, որի հետեւանքով զոհվել է յոթ մարդ, եւս 30-ը համարվում են անհետ կորած, հայտնում են բրիտանական լրատվամիջոցները:
Փրկարարներին հաջողվել է ջրից դուրս բերել մի քանի տասնյակ մարդու, նրանք տեղափոխվել են հիվանդանոց: Նավում եղել է 70 ուղեւոր:
Ողբերգությունը կատարվել է Ինդոնեզիայի արեւելքում` Արեւմտյան Թիմոր նահանգում: Դա Ինդոնեզիայի միակ նահանգն է, որտեղ քրիստոնյաները մեծամասնություն են, փոխանցում է ԻՏԱՌ-ՏԱՍՍ-ը:
Նավի ուղեւորները կաթոլիկներ են եղել եւ մասնակցում էին կրոնական ծեսին, որը տեղի է ունենում Զատկի նախօրեին` Չարչարանքների ուրբաթ օրը: Արարողության ժամանակ հավատացյալներն ուղեկցել են Հիսուս Քրիստոսի եւ Կույս Մարիամի արձանները, որոնք նավով մի կղզուց մյուսն էին տեղափոխում: