Այսօր մարդիկ քաղաքական կուսակցություններին անդամագրվում են այս կամ այն պաշտոնը ստանալու նպատակով, հետո էլ պաշտոնը պահելու համար լքում են կուսակցության շարքերը։ Այս մասին ապրիլի 19-ի մամուլի ասուլիսում հայտարարել է ՀՀ Կոմկուսի առաջին քարտուղար Տաճատ Սարգսյանը՝ անդրադառնալով ՕԵԿ-ից նախարարներ Արմեն Երիցյանի, Սերգո Կարապետյանի եւ Սամվել Թադեւոսյանի հեռացումը։
«Ինչ է նշանակում լինել նախարար եւ մեկ օրում դուրս գալ կուսակցությունից, դավաճանել սեփական կուսակցության գաղափարախոսությունը եւ դառնալ ՀՀԿ-ի կամ որեւէ այլ կուսակցության անդամ», - վրդովմունք է հայտնել Տաճատ Սարգսյանը:
Հիշեցնենք, որ ապրիլի 16-ին «Օրինաց երկրի» քաղխորհուրդը որոշում էր ընդունել իշխող կոալիցիայում ՕԵԿ-ի մնալու աննպատակահամարության մասին` Հայաստանում քաղաքական որոշումների վրա ազդելու հնարավորությունից զրկված լինելու պատճառով: Կուսակցության շարքերը լքել էին ԱԻ նախարար Արմեն Երիցյանը, գյուղատնտեսության նախարար Սերգո Կարապետյանը եւ քաղաքաշինության նախարար Սամվել Թադեւոսյանը` հավանաբար հույս ունենալով հայտնվել նոր կառավարությունում: Նշենք նաեւ, որ Արմեն Երիցյանն արդեն վերանշանակվել է ՀՀ ԱԻ նախարարի պաշտոնում: