Հարավային Կորեայի նախագահ Պակ Կըն Հեն սուր քննադատել է «Սեւոլ» խորտակված լաստանավի նավապետի եւ անձնակազմի որոշ անդամների գործողությունները: Նշելով, որ նրանք առաջիններից մեկն են լքել լաստանավը եւ անօգնական թողել հայուրավոր ուղեւորների, նախագահը նրանց գործողությունները սպանության համարժեք է անվանել, հայտնում է ԻՏԱՌ-ՏԱՍՍ-ը:
Պակ Կըն Հեն խոստացել է բացահայտել բոլոր խախտումները եւ «քրեական եւ քաղաքացիական պատասխանատվության ենթարկել» բոլոր մեղավորներին` անկախ զբաղեցրած դիրքից:
Լաստանավի խորտակման պատճառների նախնական քննության արդյունքում պարզվել է, որ վթարի պահին նավը վարել է ոչ թե նավապետը, այլ նրա երրորդ օգնականը: Իսկ լաստանավի խորտակման պատճառ կարող էր դառնալ նավի ուղղության կտրուկ փոփոխությունը:
Ապրիլի 21-ի դրությամբ հաստատվել է 64 մարդու մահը, 238 մարդ համարվում են անհետ կորած, փրկվել է 174 մարդ:
Լաստանավում եղել է 476 ուղեւոր եւ անձնակազմի անդամները: Մեծամասնությունն աշակերտներ են եղել` 325 մարդ, որոնց ուղեկցել է 15 ուսուցիչ: