Ժողովրդական կուսակցության նախագահ Տիգրան Կարապետյանը չի հասկանում, թե մարդիկ ինչու են այդքան ռեսուրսներ վատնում «կուտակայինի» դեմ պայքարելու համար, քանի որ այդ պայքարը շեղում է հասարակությանը: Այս մասին այսօր` ապրիլի 21-ին, լրագրողների հետ հանդիպման ժամանակ ասաց Տիգրան Կարապետյանը:
«Հա «Դեմ եմ», հա ի՞նչ: Պայքարը պետք է լինի ըմբոստ, միանգամից, ժողովրդի կողմից, ոչ թե պայմանավորվեն` արի ըսենց անենք, միավորվենք: Կուտակայինի դեմ պայքարը շեղում է հասարակությանը, սա արմատական հարց չի, խնդիր չի, որի մասին բարձրաձայնվի»,- ասաց նա:
Չնայած լայնածավալ պայքարին` Տիգրան Կարապետյանը համոզված է, որ այն հաջողություն չի ունենա: «Կառավարությունը կգտնի մի միջոց` լռեցնելու նրանց: Նոր վարչապետը դեպի լավը ոչինչ չի անելու, իրանց փողե՞րը պիտի բաժանեն ժողովրդին, երբեք չհավատաք»:
Լրագրողների դիտարկմանը, թե ապրիլի 18-ին, Հովիկ Աբրահամյանը եկավ «Դեմ եմ» քաղաքացիական նախաձեռնության անդամների հետ հանդիպման, կուսակցության նախագահն ագրեսիվ արձագանքեց. «Հա ի՞նչ, խոստումներ տվեց, հա ի՞նչ»:
Այնուամենայնիվ, ինչու է Տիգրան Կարապետյանն այսքան բացասական տրամադրված շարժմանը, վերջինս այդպես էլ հստակ չպատասխանեց` նշելով միայն, որ պետք չի այսքան ռեսուրսներ վատնել նման «մանր» խնդրի վրա:
Նշենք, որ «Դեմ եմ» քաղաքացիական նախաձեռնությունը պայքարում է կուտակային կենսաթոշակների մասին նոր օրենքի դեմ, որի որոշ դրույթներ թեեւ ապրիլի 2-ին Սահմանադրական դատարանի կողմից հակասահմանադրական ճանաչվեցին, շարունակում են գործել:
Լուսանկարը՝ Արսեն Սարգսյանի/NEWS.am