Ուկրաինայի Սլավյանսկ քաղաքում փակվել են բոլոր բանկերը եւ ոսկերչական խանութները, գրում է «Նովոստի Դոնբասա» թերթը` Twitter-ի միկրոբլոգում:
Հիշեցնենք, ավելի վաղ ԵԱՀԿ ներկայացուցիչները հայտնել էին, որ առաքելությունը չի կարողանում Սլավյանսկ մտնել: «Մենք լուրեր ունենք Սլավյանսկում բռնությունների մասին, մեր դիտորդները չեն կարողացել մտնել այդ բնակավայր` անվտանգության նկատառումներից ելնելով», - հայտնել էր Ուկրաինայում ԵԱՀԿ հատուկ մոնիտորինգային առաքելության մամուլի գրասենյակի ղեկավար Մայքլ Բոցյուրկիվը:
Լրատվամիջոցները նաեւ հայտնում են, որ Սլավյանսկում ռուսամետ ակտիվիստները առեւանգել են բելառուսցի լրագրող Դմիտրի Գալկոյին: Այդ մասին վերջինս հասցրել էր գրել Facebook-ում:
Նրա հետ բռնել էին նաեւ իտալացի լրագրողների, սոցցանցում պատմել էր ուկրաինացի լրագրող Դենիս Կազանսկին:
Ավելի վաղ հայտնի էր դարձել, որ տեղի ակտիվիստները ձերբակալել էին Եվրամայդանի լրագրողուհի եւ ակտիվիստուհի Իրմա Կրատին: