Ֆրանսիացի լրագրող Անրի Բարբին, որին ֆրանսիական «Le journal» ամսագիրը Ռուսաստանի եւ Թուրքիայի միջեւ պատերազմը լուսաբանելու համար ուղարկել էր Կովկասյան ճակատ՝ տեղ հասնելով, ռուս-թուրքական ռազմական գործողությունների մասին գրելու փոխարեն, սկսել է գրել հայերի իրավիճակի մասին: Այդ մասին NEWS.am-ի թղթակցի հետ զրույցում պատմել է Մոնքթոնի համալսարանի(Կանադա) լեզվաբանության դոկտոր Սիլվիա Գասպարյանը:
Նրա խոսքով՝ ֆրանսիացի լրագրողը նկարագրել է, թե ինչ սարսափելի իրավիճակում են գտնվում բազմաթիվ հայ որբեր, որոնք մնացել են առանց սնունդի եւ օգնության: «Այս կապակցությամբ 1917թ.-ին նա ֆրանսերեն գիրք է գրել՝ «Սարսափի երկրում. Տառապյալ Հայաստան»: Նա համոզված էր, որ աշխարհը չի կարող լռել նման սարսափելի իրադարձությունների առթիվ: Գրքում հեղինակն անդրադառնում է փախստականների եւ հումանիտար օգնության թեմային: Դրանում մանրամասն տեղեկություններ են պարունակվում այն ժամանակվա նամակների ու հոդվածների տեսքով, որոնք վկայում են նրա տեսածի ու գրածի հավաստիության մասին»,- ասել է Սիլվիա Գասպարյանը՝ հավելելով, որ գիրքը մեծ ապացույց է Օսմանյան Թուրքիայում հայերի հետ կատարվածի մասին:
Անրի Բարբիի համար, ընդգծել է նա, շատ կարեւոր էր, որպեսզի աշխարհն իմանար այդ մասին: Սիլվիա Գասպարյանը նաեւ հաղորդել է, որ 1919թ.-ին գիրքը թարգմանվել է հայերեն ու ռուսերեն: «Այժմ գիրքը դարձյալ կհրապարակվի, քանի որ մեծ կարեւորություն է ներկայացնում»,- եզրափակել է նա:
