Ուկրաինայի իշխանությունը պատրաստ է լսել երկրի Արեւելքում եւ Արեւմուտքում ուկրաինացիների բոլոր պահանջները։ Եվ ոչ միայն լսել, այլեւ ընդառաջ գնալ, ասված է Ուկրաինայի կառավարության հաղորդագրությունում։
«Ուկրաինայի իշխանությունը պատրաստ է լսել Արեւելքում եւ Արեւմուտքում ուկրաինացիների բոլոր օրինական պահանջները։ Եվ մենք կոչ ենք անում կատարել ժնեւյան համաձայնագրերի դրույթները, որոնք կնքվել էին Ուկրաինայի, Ռուսաստանի, ԱՄՆ-ի եւ ԵՄ-ի միջեւ», - ընդգծել են կառավարությունում։
Մասնավորապես, կառավարությունը հիշեցրել է, որ իշխանությունը որոշակի քայլեր է արել, որոնցով սկսել է իրագործել պայմանավորվածություների իրենց վերաբերող մասը։
«Կառավարությունը երաշխավորում է ռուսերենի հատուկ կարգավիճակի պաշտպանությունը եւ ամրագրումը։ Տարածքային համայնքները իրենք են որոշելու իրավունքների ծավալը, որոնք իրենք տրամադրելու են ռուսերենին կամ ցանկացած այլ լեզվի։
Կառավարությունը վճռականորեն դատապարտում է հակասեմականության, այլատյացության եւ անհանդուրժողականության ցանկացած դրսեւորում։ Դոնեցկում հակասեմական բնույթի թռուցիկներ տարածելու փաստով Անվտանգության ծառայությունն արդեն քննություն է վարում», - ասվում է փաստաթղթում, մեջբերում է ՈՒՆՆ-ն։
