Լիտվան հարեւանների հետ հարաբերություններում խաղաղություն եւ կայունություն է ցանկանում, այդ թվում նաեւ՝ Ռուսաստանի հետ, ապրիլի 23-ին Երեւանում կայացած մամուլի ասուլիսում հայտարարել է Լիտվայի ազգային պաշտպանության նախարար Յուոզաս Օլեկասը՝ պատասխանելով հարցին, թե արդյոք Ուկրաինայի դեպքերի շուրջ ստեղծված իրավիճակը կազդի ՆԱՏՕ-ի դաշնակիցների հարաբերությունների վրա:
Նախարարը հիշեցրել է, որ ՆԱՏՕ-ի եւ ՌԴ-ի միջեւ երկարատեւ համագործակցություն կար, սակայն ներկայումս ծրագրերի մեծ մասը չեղյալ են հայտարարվել: Ընդգծելով, որ Լիտվան ցանկանում է Ուկրաինայում ստեղծված իրավիճակի խաղաղ կարգավորում, Օլեկասը նշել է բալթյան շրջանում ՆԱՏՕ-ի ուժերի ավելացումը:
Նա նաեւ հայտնել է, որ Լիտվան կողմ է Արեւելյան գործընկերության մասնակից երկրների խորացված համագործակցությանը: Նա հիշեցրել է, որ Լիտվան արդեն տասը տարի է ՆԱՏՕ-ի անդամ է: «ՆԱՏՕ-ի հետ մեր հարաբերությունները հնարավորություն տվեցին ժողովրդականացնել եւ բարելավել Զինված ուժերը, եւ մենք ցանկանում ենք մեր փորձը կիսել Հայաստանի հետ», - հայտարարել է Յուոզաս Օլեկասը:
Լուսանկարը՝ Արսեն Սարգսյանի/NEWS.am