Հայաստանի երկրորդ նախագահ Ռոբերտ Քոչարյանի տված հարցազրույցը Սահմանադրական բարեփոխումների վերաբերյալ իրականում ուղղված էր գործող նախագահ Սերժ Սարգսյանին, նույնիսկ նորանշանակ վարչապետ Հովիկ Աբրահամյանի մասին չեզոք կարծիքն ուղղված էր նախագահին: Այս մասին NEWS.am-ին ասաց քաղաքական եւ ընտրական տեխնոլոգիաների փորձագետ Արմեն Բադալյանը:
«Ռոբերտ Քոչարյանն իրականում քննադատում է իշխանություններին, հատկապես գործող նախագահ Սերժ Սարգսյանին: Եթե նայենք հարցազրույցը, ապա վերջին հարցի պատասխանը, թե նախագահը երկրի ճակատագրով անկեղծ մտահոգությունը չտարբերեց իշխանությունների գործունեության ողբալի արդյունքների վրա չարախնդալուց, ուզեցել է ասել, որ իշխանությունների գործողություններն ունեցել են ողբալի արդյունք, եւ խոսքը ոչ միայն կառավարությանն է ուղղված, այլեւ հենց նախագահին: Սա հենց բացահայտ քննադատություն է: Միայն այս նախադասությունը չէ: Ամբողջ հարցազրույցում Քոչարյանը քննադատում է Սերժ Սարգսյանին»,- ասաց նա:
Արմեն Բադալյանը համոզված է, որ նույնիսկ Հովիկ Աբրահամյանի մասին կարծիքը ուղղված է նախագահին:
«Հովիկ Աբրահամյանի մասին որ ասաց, թե իր ժամանակ նախարար է եղել, Քոչարյանն ուզում էր ասել, որ Սերժ Սարգսյան, դու էլ ժամանակին Պաշտպանության նախարար ես եղել, բայց հիմա լավ նախագահ չես»,- նշեց փորձագետը:
Նշենք, որ ապրիլի 22-ին 2rd.am-ին տված հարցազրույցում Հայաստանի երկրորդ նախագահ Ռոբերտ Քոչարյանն անդրադարձել է Սահմանադրական բարեփոխումներին, ինչպես նաեւ նախկին եւ ներկայիս վարչապետերին, գործող նախագահ Սերժ Սարգսյանին:
