News
Լրահոս
News
Հինգշաբթի
Ապրիլ 25
Տեսնել լրահոսը

Բրիտանական խորհուրդը ՀՀ Արդարադատության նախարարության հետ համատեղ նախաձեռնել է բրիտանական ֆիլմերի ցուցադրությունների շարք Հայաստանի քրեակատարողական հիմնարկներում: Ապրիլի 15-ից 29-ը մայրաքաղաքի եւ մարզերի հինգ քրեակատարողական հիմնարկներում ցուցադրվելու են վերջին տարիների արտադրության բրիտանական ֆիլմեր:

Նախաձեռնությունն իրականացվում է Բրիտանական ֆիլմերի փառատոնի շրջանակում:

«Բրիտանական ֆիլմերի փառատոնն այս տարի անց էր կացվում ներառական հասարակություն ձեւավորելու գաղափարի ներքո: Փառատոնի շրջանակում իրականացված մրցույթներն ու միջոցառումները նպատակ ունեին ներգրավելու հասարակության տարբեր խմբերի ներկայացուցիչներին: Քրեակատարողական հիմնարկներում ցուցադրությունների շարքը նույն նպատակի շարունակությունն է»,-ասաց Բրիտանական խորհրդի հայաստանյան մասնաճյուղի տնօրեն Արեւիկ Սարիբեկյանը:

Այս տարի Բրիտանական ֆիլմերի փառատոնի նպատակն էր բոլորիս ուշադրությունը հրավիրել սոցիալապես խոցելի խմբերի ներկայացուցիչներին:

«Կարեւոր է, որ քրեակատարողական հիմնարկներում մարդիկ ընդգրկված լինեն հասարակության սոցիալ մշակութային կյանքին,  իրազեկ լինեն տեղի ունեցող գործընթացներին, հաղորդակցվեն այլ մշակութային արժեքների հետ: Ֆիլմերի ցուցադրություններն առաջին նման  փորձն էր, որ երբեւէ տեղի է ունեցել քրեակատարողական հիմնարկներում եւ պետք է ասել, որ այն հաջողել է: Նախաձեռնությունը լայն արձագանք է գտել ազատազրկված անձանց  շրջանում»,- ասաց ՀՀ արդարադատության նախարարության «Իրավախախտում կատարած անչափահասների հատուկ ստեղծագործական կենտրոն» ՊՈԱԿ-ի տնօրեն Գայանե Հովակիմյանը:

Ֆիլմերն արդեն ցուցադրվել են «Սեւան», «Արթիկ» եւ «Աբովյան» քրեակատարողական հիմնարկներում, իսկ մինչեւ ապրիլի վերջ ցուցադրություններ կկազմակերպվեն նաեւ «Վարդաշեն» եւ «Կոշ» քրեակատարողական հիմնարկներում:  Նախաձեռնությանն աջակցել են Երեւանում Բրիտանական դեսպանատունը եւ ՀՀ Արդարադատության նախարարությունը:

Տպել
Ամենաշատ