Հայոց ցեղասպանության փաստի ճանաչումը ինչ-որ առումով դարձել է իրական ժողովրդավարության առաջին ապացույցը, եւ քրդերը առաջին խումբն են, որ չկարողացան խուսափել դրանից: Այս մասին ապրիլի 23-ին «Իրադրությունը Թուրքիայում եւ Հայաստանում 99 տարի անց» թեմայով քննարկմանը հայտարարել է թուրքագետ Ռուբեն Մելքոնյանը:
Ըստ նրա՝ վերջին ժամանակներս քրդերի մոտ սկսվել է Հայոց ցեղասպանության գիտակցման եւ այդ հարցը բարձրացնելու գործընթացը: Առաջին հերթին, նշել է նա, պատճառն այն է, որ քրդերի մի մասը, մասնակից լինելով այդ ողբերգական իրադարձությունների իրագործմանը, հասել են մի փուլի, երբ ընդունում են իրենց մեղքը: «Մյուս կողմից էլ, քրդերն արդեն երկար ժամանակ քաղաքական պայքար են մղում, եւ այդ պայքարի դրոշն է ճնշված ժողովուրդների իրավունքների պաշտպանությունը: Եթե քրդերը Թուրքիայի պետական կառույցներում հանդես են գալիս հրապարակային քննադատությամբ, ապա ամենաառաջին հարցն է՝ կտա՞ն արդյոք քրդերը համապատասխան գնահատական այն ողբերգությանը, որին իրենք նույնպես մասնակցել են», - ընդգծել է Ռուբեն Մելքոնյանը: