Ուկրաինայում Սլավյանսկի եւ Սվյատոգորսկի միջեւ, այսօր՝ ապրիլի 24-ին փոխհրաձգություն է տեղի ունեցել, որի հետեւանքով, նախնական տեղեկություններով, զոհվել է երկու տղամարդ, կան վիրավորները: Այս մասին հաղորդում է տեղի Slavgorod.com.ua պարբերականը:
«Այսօր առավոտյան Սլավյանսկի եւ Սվյատոգորսկի միջեւ զինված մարդկանց խումբ է հայտնաբերվել: Անցակետին այնտեղ է ուղեւորվել մոբիլ խումբը: Տեղի ինքնապաշտպանության ներկայացուցիչների խոսքով՝ անտառի կողմից իրենց վրա կրակ են բացել»,-ասված է հաղորդագրության մեջ:
Տեղի ունեցածի մանրամասները ճշտվում են:
Gazeta.ru-ի փոխանցմամբ՝ «Կոմբիկոր» անցակետի մոտ փոխհրաձգություն է ընթանում, այնտեղ է գտնվում մեկ մարտական հետեւակի մեքենա: Մարտադաշտի կողմից ուժեղ, սեւ ծուխ է ելնում:
Խարկով-Ռոստով մայրուղու վրայի անցակետում նույնպես մարտեր են ընթանում: մոտակայքում գտնվող դպրոցից տարհանել են բոլոր երեխաներին: Տեղի բնակիչները հայտնում են 6 զոհի մասին, բայց այդ տվյալները չեն հաստատվել: