Եվրասիական ինտեգրման շրջանակներում Հայաստանից միգրանտները կարող են նոր արտոնություններ ստանալ: Այդ մասին Երեւանում լրագրողների հետ զրույցում հայտնել է Ռուսաստանի դաշնային միգրացիոն ծառայության ղեկավար Կոնստանտին Ռոմոդանովսկին:
Միացյալ տնտեսական տարածքի շրջանակներում ՀՀ քաղաքացիները կարող են ազատվել աշխատանքի թույլտվություն ստանալուց, իսկ գործատուները՝ նրանց աշխատանքի ընդունելու սահմանափակումներից: ՄՏՏ երկրներից միգրանտները կարող են ազատվել նաեւ միգրացիոն հաշվառման կանգնելու անհրաժեշտությունից: Աշխատանքային միգրանտների երեխաներին թույլատրվում է հաճախել մինչդպրոցական հաստատություններ:
Բացի այդ, կրթության փաստաթղթերը գործելու են առանց վավերացման ընթացակարգերի, իսկ աշխատողները անվճար շտապօգնություն են ստանալու նույն հիմունքներով, ինչ ընդունող երկրի քաղաքացիները: «Ապահովագրական ստաժը հաշվարկվելու է ընդհանուր աշխատանքային ստաժում սոցիալական ապահովագրման համար, բացի կենսաթոշակայինից»,- նշել է ՌԴ ԴՄԾ ղեկավարը:
Ռոմոդանովսկու խոսքով, այսօր կատարելագործվում են աշխատանքի արտոնագրեր ստանալու ընթացակարգը, մշակվում է օրինագիծ իրավաբանական անձանց եւ անհատ ձեռներեցների կողմից աշխատանքի ընդունելու համար:
