1993-94թթ. Արցախում ռազմի դաշտում արված մոտ 7 տասնյակ լուսանկարներ առաջիկա օրերին կցուցադրվեն Սարդարապատի հերոսամարտի հուշահամալիրի հայոց ազգագրության և ազատագրական պայքարի պատմության ազգային թանգարանում: «Պատերազմի և խաղաղության դեմքը» խորագրով ցուցադրությունը բացվեց այսօր՝ մայիսի 27-ին:
«Հատուկ ուշադրություն ենք դարձրել մեր թանգարանի առաքելությանը, որն է՝ ցանկացած ցուցադրություն ներկայացնել մշակութաբանական դիտանկյունից: Դրա համար մենք ներկայացրել ենք պատերազմի և խաղաղության բևեռները: Այցելուն այստեղ կարող է տեսնել պատերազմի և խաղաղության դեմքը՝ պատկերների միջոցով: Շատ ուշագրավ են երեխաների դեմքերը, որոնք հենց կոչվում են պատերազմի երեխաներ»,- ասաց թանգարանի գիտական գծով փոխտնօրեն Սվետլանա Պողոսյանը:
Ցուցահանդեսը նվիրված է 1994թ. Բիշքեկում կնքված ղարաբաղա-ադրբեջանական պատերազմում հրադադարի մասին պայմանագրի 20-ամյակին:
