Անվտանգության դաշնային ծառայությունը եւ Ռոսկոմնադզորը օրենսդրական ուղղումներ են մշակել, համաձայն որոնց ինտերնետ-ընկերությունները, համապատասխան հայտ ստանալու պարագայում, այսուհետ պարտավոր կլինեն օգտատերերի մասին տվյալներ ներկայացնել իրավապահ մարմիններին, գրում է «Վեդոմոստի» պարբերականը:
Փաստաթուղթը նաեւ կայքերի ցանկ է ներկայացնելու, որոնք պարտավոր են կամ ինքնուրույն գրանցվել Ռոսկոմնադզորում, կամ էլ, իրավապահների կողմից համապատասխան ծանուցագիր ստանալուն պես, պահանջվող գործողություններն իրականացնել: Պարբերականին տված հարցազրույցի ընթացքում Պետդումայի տեղեկատվական քաղաքականության հարցերով հանձնաժողովի նախագահ Ալեքսեյ Միտրոֆանովը հայտարարել է, որ նոր օրենքը տարածվելու է մասնավորապես բոլոր սոցցանցերի, բլոգհոսթինգների եւ ֆորումներ վրա: Վերահսկողությունից ազատ են լինելու կրթական եւ գիտական ռեսուրսները, ինչպես նաեւ մշակույթին առնչվող կայքերը:
Փաստաթղթում նշվում է նաեւ, թե հատկապես ինչ տեղեկատվություն կարող է հետաքրքրել իրավապահներին: Խոսքը օգտատերերի իդենտիֆիկատորի (լոգին), էլեկտրոնային փոստի բոլոր հասցեների (ինչպես հիմնական, այնպես էլ` վերահասցեագրման համար կիրառվող), բոլոր կոնտակտների, ստացվող եւ ուղարկվող հաղորդագրությունների քանակի ու ծավալի եւ աքքաունթի փոփոխությունների մասին է:
Հատուկ ծառայություններին կարող է անգամ հետաքրքրել, թե սոցցանցերի, ինտերնետ-ֆորումների, բլոգհոսթինգների օգտատերերը երբ եւ որ էջերն են առավել հաճախ այցելում: Ընկերությունները պարտավոր են նաեւ վճարովի ծառայություններից օգտվողների մասին տվյալներ ներկայացնել, ներառյալ` թե որքան է վճարվել եւ որ վճարային համակարգով: Այդուհանդերձ, նամակագրությունների, փոստերի, մեկնաբանությունների եւ այլ հաղորդագրությունների բովանդակությունը գաղտնի կմնա:
Համաձայն նոր կանոնակարգի, եթե ընկերությունը չի ցանկանում տվյալներ պահպանել կամ տեխնիկական հնարավորություն չունի դրա համար, ապա պարտավոր է հատուկ ծառայությունների օպերատիվ հետախուզական գործունեություն ծավալող գործակալներին օգտատերերի տվյալների ամբողջական հասանելիություն տրամադրել: