Ոստիկանության Շենգավիթի բաժնի պետ Վահան Մամիկոնյանը, ով վարչապետ Հովիկ Աբրահամյանի փեսան է, հունիսի 6-ին, իր զեկուցագրի համաձայն ազատվել է զբաղեցրած պաշտոնից: Նա զեկուցագիրը գրել է մայիսի 27-ին բայց ստորագրվել է հունիս 6-ին: Վահան Մամիկոնյանի ազատման դիմումը դիտարկվում է Հովիկ Աբրահամյան-Վլադիմիր Գասպարյան լարված հարաբերությունների համատեքստում, սակայն նախկին պետը NEWS.am-ի թղթակցի հետ զրույցում համառորեն հերքում էր այս պատճառը: Շրջանառվում է նաեւ մի պատճառ, որ Հովիկ Աբրահամյանը Գասպարյանին պաշտոնանկության չհասնելուց հետո պարզապես լծվել է իր բարեկամին լավ պաշտոնի փնտրտուքներին: Թեմայի վերաբերյալ NEWS.am-ի հարցերին պատասխանել է Վահան Մամիկոնյանը:

Պարոն Մամիկոնյան, նոր պաշտոնի խոստում կա՞ր, որ զեկուցագիր գրեցիք

Ոչ ոչ, ոչինչ կանխորոշված չէ:

Գրել եք, առանց իմանալո՞ւ՝ Ձեզ ինչ է սպասվում:

Չէ, բոլորովին, չգիտեմ:

Իսկ մի գուցե Հովիկ Աբրահամյան- Վովա Գասպարյան սրված հարաբերություննե՞րն են պատճառը, որ զեկուցագիր գրեցիք:

Ես նորից եմ ասում՝ բացարձակապես նման հարց չկա, ես զեկուցագիր գրել եմ ամսի 27-ին, իմ հրամանը եղել է ամսի 5-ին:

Բայց մինչ այդ նորմալ աշխատում էիք եւ զեկուցագիր գրելու ցանկություն չեք ունեցել, չէ՞:

Բայց հիմա գրել ու համակարգից դուրս եմ եկել:

Ըստ լուրերի, Հովիկ Աբրահամյանն է հորդորել Ձեզ լքել համակարգը:

Ոչ, ես նման տեղեկություն չունեմ:

Մինչ Աբրահամյանի վարչապետ նշանակվելը, մինչեւ իր լիազորությունների շրջանակի նման ընդլայնումը, ինչո՞ւ չէիք դուրս գալիս համակարգից եւ միայն իր նշանակվելուց ու այդ հարաբերությունների լարվածությունից հետո գրեցիք:

Ի՞նչ է նշանակում մինչեւ այդ… ոչ մի պատճառ չկա, գրել, դուրս եմ եկել:

Մի գուցե բարձր պաշտոն է խոստացել Աբրահամյանը հենց կառավարության կազմում:

Չէ այս պահին նման որոշում չունեմ: Հնարավոր չի:

Ինչո՞ւ:

Ես ասում եմ՝ ես որոշել էի համակարգից դուրս գամ եւ զեկուցագիր գրեցի՝ գնացի:

Ինչու այդքան երկարաձգվեց ոստիկանապետի ստորագրությունը եւ նույն օրը չի ստորագրվել:

Ես նորից եմ ասում՝ երեւի նախարարը զբաղված է եղել, զեկուցագիր եմ գրել, ինքն էլ քննարկել ու ստորագրել է: Բացարձակապես Հովիկ Աբրահամյանի հետ կապված թեմա չկա:

Իսկ եթե ոստիկանապետը փոխվի, հնարավո՞ր է վերադառնաք համակարգ:

Բացարձակապես… ախր դա ինչ հարց է, ես գրել դուրս եմ եկել…2011 թվականին եմ նշանակվել Շենգավիթի պետ, Գասպարյանը ինձ չորս հատ մեդալով պարգեւատրել է իմ կատարած աշխատանքի համար: