Հայկական կողմը կտրականապես հերքում է ադրբեջանցի զինվորների վիրավորվելու գործում իր մասնակցությունը: NEWS.am-ի թղթակցին պաշտպանության նախարարի մամուլի խոսնակ Արծրուն Հովհաննիսյանը տեղեկացրել է, որ հայ-ադրբեջանական սահմանին լուրջ միջադեպեր չեն գրանցվել: «Ադրբեջանցի զինվորների վիրավորվելու հետ հայկական կողմը կապ չունի», - ընդգծել է Հովհաննիսյանը եւ միաժամանակ նշել, որ վերջերս իրավիճակի լարվածություն, հաճախակի միջադեպեր են գրանցվում:
«Բոլորին է հայտնի, որ ադրբեջանական կողմը պարբերաբար սրում է իրավիճակը, եւ հայկական կողմն ի պատասխան համապատասխան քայլերի է դիմում հակառակորդին հանդարտեցնելու համար»,- ասել է Արծրուն Հովհաննիսյանը:
Ադրբեջանական մամուլի տվյալով՝ հուլիսի 3-ի երեկոյան իբրեւ թե վիրավորվել էր զինվոր Նուրլան Հասանովը (ծնվ. 1995թ.), հուլիսի 4-ի գիշերն էլ՝ պրապորշչիկ Անար Նագիեւը (ծնվ. 1989թ): Ընդ որում, չէին նշվել ուղղությունները, որտեղ գրանցվել էին տվյալ միջադեպերը: