Կառավարությունը հարկային արտոնություններ է տվել Սամվել Ալեքսանյանին պատկանող «Ա եւ Գ» ՍՊԸ-ին, որը զբաղվում է օղու շշալցմամբ: Էկոնոմիկայի փախնախարար Գարեգին Մելքոնյանը, ներկայացնելով նախագիծը, հայտարարել է, որ ընկերությունը 1.3 մլրդ դրամի սարքավորումներ ներկրելիս 3 տարով կազատվի ԱԱՀ-ից:
Հիմնավորման մեջ նշվում է, որ «Ա եւ Գ» ՍՊԸ-ն մտադիր է օղու արտադրության համար իտալական սարքավորումներ ներկրել՝ մինչեւ 20,1մլրդ դրամի սահմաններում:
Արտադրանքի 25%-ը նախատեսվում է արտահանել Ռուսաստան, Իրաք, Վրաստան: Ամբողջական ծանրաբեռնվածության դեպքում արտադրամասում 40 աշխատատեղ կստեղծվի՝ 110 հազ. դրամ միջին աշխատավարձով:
Նշենք, գործարար պատգամավոր Սամվել Ալեքսանյանին պատկանող ամենամեծ ընկերությունը «Ալեքս Գրիգն» է, որն զբաղվում է սննդամթերքի ներմուծմամբ, այդ թվում նաեւ՝ օղու: 2010-11 թթ. ընկերությունը հերթական անգամ հայտնվել էր ուշադրության կենտրոնում՝ ուկրաինական օղու ապրանքանիշները կեղծելուց հետո («Նեմիրոֆ» եւ այլն), որը հարուցել էր դեսպանի եւ Ուկրաինայի կառավարության ներկայացուցիչների բացահայտ դժգոհությունը:
Էկոնոմիկայի փոխնախարար Գարեգին Մելքոնյանը չի պատասխանել լրագրողների այն հարցին, թե արդյոք «Ա եւ Գ» ընկերությունը պատկանում է Սամվել Ալեքսանյանին:
Ենթադրությունը հաստատվեց, երբ մենք խանութներից մեկում «Ա եւ Գ» ընկերության շշալցրած օղի ձեռք բերեցինք: Օղին ունի «Զելյոնայա մետկա» կասկածելի անվանումը եւ արտաքինով հիշեցնում է «Զելյոնայա մարկա» ապրանքատեսակը (երկու անգամ էժան արժե): Ամենահետաքրքիրն այն է, որ ընկերության հասցեն նույնն է, ինչ եւ «Ալեքս Գրիգ»-ինը:
Հարցին, թե փոխկապակցված են արդյոք «Ա եւ Գ» ընկերությունը «Ալեքս Գրիգի» հետ, «Ալեքս Գրիգի» մարքեթինգի տնօրեն Էդգար Այվազյանը պատասխանեց. «Ոչ, նման բան չկա: Ոչ մի նման բանի մասին տեղյակ չեմ»:
