Եթե Հայաստանը փաստաթուղթ ստորագրի Եվրասիական տնտեսական միության հետ, դա չի նշանակում, որ փակվում են դռները Եվրոպական միության հետ երկխոսության եւ «Համագործակցության մասին», «Գործընկերության մասին» կամ «Ասոցացման մասին» փաստաթղթերիի ստորագրման համար: Այդ մասին NEWS.am-ի թղթակցի հետ զրույցում հայտարարել է Հայաստանում Գերմանիայի արտակարգ եւ լիազոր դեսպան Ռայներ Մորելը:
Դեսպանը պարզաբանել է, որ այս պահին Ասոցացման մասին համաձայնագիրը ենթադրում է ԵՄ հետ Մոլդովայի, Վրաստանի եւ Ուկրաինայի կնքած միջազգային պայմանագրեր: «Եթե Հայաստանի դեպքում այդ փաստաթուղթը չներառի նշված համաձայնության ողջ բովանդակությունը, ապա եզրն ու անվանումն այլ պետք է լինեն: Սակայն դա այնքան էլ կարեւոր չէ, կարեւոր է ձեռք բերված համաձայնության էությունը»,- ընդգծել է Ռայներ Մորելը: Դիվանագետը կարծիք է հայտնել, որ Հայաստանի սպասվող անդամակցությունը Եվրասիական տնտեսական միությանը չի խոչընդոտելու Հայաստան-ԵՄ հարաբերություններին:
«Մեր երկրում մենք ականատես ենք շատ բարեփոխումների, որոնք իրականացվել են ԵՄ օգնությամբ, որոնք տեղ են գտել քաղաքական բնագավառում, եւ կարող են տեղ ունենալ նաեւ տնտեսական բնագավառում: Սակայն որոշ երեւույթներ անհնարին կդառնան, քանի որ դրանք բացառելու են միմյանց, հետեւաբար, ինչ-որ բան անհնար կլինի: Եվրամիությունն ասում է՝ մենք պետք է հայկական կողմից իմանանք, թե ինչ է ստորագրվելու, ինչն է հնարավոր, ինչը՝ ոչ: Դուք պետք է բացատրեք դա»,- նշել է Ռայներ Մորելը:
Հիշեցնենք, որ 2013թ.-ի նոյեմբերի 28-29-ին Վիլնյուսում Եվրոպական Միության «Արեւելյան գործընկերության» գագաթաժողովում Հայաստանը չվավերացրեր ԵՄ հետ ասոցացման համաձայնագիրն այն բանից հետո, երբ սեպտեմբերի 3-ին հայտարարեց Մաքսային միությանն անդամակցելու մասին:
