ՌԴ կրթության եւ գիտության նախարարությունը հաստատել է աշխատանքային միգրանտների համար քննություն անցկացնելու ընթացակարգը: Օրինական ճանապարհով աշխատանքի տեղավորվելու համար միգրանտները պետք է քննություն հանձնեն ոչ միայն ռուսերենից եւ պատմությունից, այլեւ` Ռուսաստանի քաղաքական կառուցվածքից, փոխանցում է «Իզվեստիան»:
Թեստում ընդգրկված են հարցեր, որոնք պետք է իմանան Ռուսաստան ժամանած միգրանտները: Այն բաղկացած է չորս մասից: Առաջինը սահմանում է օտարերկրացիների «հաղորդակցվելու ունակության մակարդակը». Նրանք պետք է կարողանան կարդալ փոքր տեքստեր` գովազդ, հայտարարություններ, հարցազրույց, նշաններ, կարողանան դիմումներ լրացնել, հասկանալ երկխոսությունները: Նվազագույն բառապաշարը կազմում է 850 բառ:
Երկրորդ մասը նվիրված է Ռուսաստանի պատմության կարեւոր իրադարձություններին: Միգրանտները պետք է իմանան հիմնական պատմական անձանց, ինչպես նաեւ երկրի տարբեր կրոնների եւ ազգային ավանդույթների հիմքերը: Երրորդ կետը ներառում է Ռուսաստանի սահմանադրական կառուցվածքի իմացություն: Իսկ չորրորդը ռուսական իրավունքի եւ օտարերկրացիների իրավական պատասխանատվության իմացությունն է:
Քննությունը հաջող հաղթահարածներին հատուկ սերտիֆիկատ կհանձնեն, որը թույլ է տալիս դիմել ԴՄԾ` աշխատանքի թույլտվության համար:
Քննության տարբերակները կմշակվեն 27 երկրների միգրանտների համար:
