«Օրինաց երկիր» կուսակցության նախագահ Արթուր Բաղդասարյանը չի հասկանում, թե վարչապետ Հովիկ Աբրահամյանն ինչու է հայտարարել, որ տեղյակ չէ, թե ով է «Նաիրիտ» գործարանի սեփականատերը»։ Այս մասին այսօր՝ հուլիսի 18-ին, ՕԵԿ-ի նախաձեռնած հանրահավաքի ժամանակ հայտարարեց Արթուր Բաղդասարյանը։
«Օրերս Հայաստանի վարչապետը հայտարարել է, որ չեն կարողանում գտնել «Նաիրիտի» սեփականատիրոջը եւ դիմել է լրագրողներին՝ օգնելու համար։ Եթե վարչապետը կատակ է արել, շատ վատ է, որովհետեւ աշխատակիցներն արդեն տասնվեց ամիս սպասում են իրենց աշխատավարձին, իսկ եթե կատակ չի արել, ապա մտահոգիչ է, որ երկրի կառավարության ղեկավարը տեղյակ չէ, թե ում է պատկանում արդյունաբերական խոշորագույն գործարանը»,- ասաց նա։
Արթուր Բաղդասարյանի խոսքով՝ ինքն այս թեմային անդրադառնում է «Նաիրիտի» թեմային, որովհետեւ իրեն խնդրել են։
Նշենք, որ Ազատության հրապարակում հրավիրված հանրահավաքն ուղղված է էլեկտրաէներգիայի թանկացմանը։