Միջազգային հանրությունը պետք է քննչական գործողություն ծավալի Ուկրաինայի արևելքում հուլիսի 17-ի երեկոյան մալայզիական Boeing օդանավի կործանման կապակցությամբ եւ բոլոր ներկայացված փաստերը համադրելով՝ պատժի Ռուսաստանին եւ քաղաքական, եւ քրեական առումով: Այս մասին NEWS.am-ի թղթակցի հետ զրույցում ասաց Քաղաքական եւ միջազգային հետազոտությունների հայկական կենտրոնի փորձագետ Ռուբեն Մեհրաբյանը:
«Նախ եւ առաջ ռուսամետ տեռորիստների ձեռքում հայտնվել են հակաօդային պաշտպանության միջոցներ, ինչի մասին հենց իրենք էին գլուխ գովալով բարձրաձայնում եւ համացանցում տեղադրել էին տեսանյութեր: Բացի դրանից՝ Ռուսաստանի գլխավոր պրոպագանդիստական ռեսուրսներում տեսանք, որ ուկրաինացի գրոհայինները խփել են ուկրաինական ռազմական ինքնաթիռ, սակայն երբ պարզ դարձավ, որ ուղեւորատար օդանավ է կործանվել, ապա տպավորությունն այնպիսին էր, որ տեղի է ունեցել կոպիտ սխալմունք, այսինքն ռուսներն ուղղակի ուղեւորատար ինքնաթիռը դրել էին ռազմական օդանավի տեղ եւ հիմա փորձում են տակից դուրս գալ: Ես համոզված եմ, որ մեղավորն ու գլխավոր պատասխանատուն Ռուսաստանն է, որովհետեւ իրենք են հովանավորում այդ տեռորիստներին: Բացի դրանից Ռուսաստանն է, որ վերջին շրջանի զինատեսակներն է մատակարարում այդ տեռորիստներին»,- ասաց նա:
Փորձագետի պնդմամբ՝ միջազգային քննչական գործողություններ պետք է կատարվեն՝ մեղավորին պատժելու համար, հակառակ դեպքում աշխարհում ինչքան ահաբեկիչ կա, կոգեւորվի եւ կփորձի նույնը կրկնել:
Հիշեցնենք, որ օդանավի կործանման հետեւանքով զոհվել են դրանում գտնվող բոլոր 298 մարդիկ։ Օդանավում գտնվել են մի քանի երկրների քաղաքացիներ, այն իրականացնելիս է եղել Ամստերդամ- Կուալա Լումպուր չվերթը։