Ազգային ժողովի ՀՅԴ խմբակցության պատգամավոր Արծվիկ Մինասյանը կարծում է, որ ՕԵԿ-ը լավ կանի հանդիպի քառյակի կամ «Դեմ եմ» շարժման հետ, քան հրապարակային մեսիջներ ուղարկի: NEWS.am-ի հարցին՝ արդյոք ՕԵԿ-ի հուլիսի 18-ին հրավիրված հանրահավաքն ուղղված էր քառյակին եւ «Դեմ եմ» քաղաքացիական նախաձեռնությանը՝ այսպես պատասխանեց ՀՅԴ-ական պատգամավորը:
«Անկեղծ ասած այսքան խորը չեմ ուսումնասիրել հարցը, քաղաքական ուժ է, որը հայտարարել է ընդդիմություն լինելու մասին եւ իր գործողություններն է ծրագրավորում կամ իրականացնում: Աստված իրենց հետ, եթե թեկուզ մի չնչին դրական բան էլ փոխվի մեր երկրում ՕԵԿ-ի գործողություններով, ես միայն ուրախ կլինեմ: Ինչ վերաբերվում է քառյակին կամ «Դեմ եմ» շարժմանը հրապարակային մեսիջներ ուղարկելուն, կարծում եմ՝ ճիշտ տարբերակ ընտրված չէ, եթե նման մտադրություն է եղել: Դրա համար կա շատ հստակ ձեւ՝ հանդիպել, քննարկել, ես որեւէ խնդիր չեմ տեսնում: Բայց հրավիրել հրապարակային քննարկման, կարծում եմ, որ սա քաղաքական տեխնոլոգիաների հնացած ձեւ է»,- ասաց նա:
Նշենք, որ հուլիսի 18-ին կոալիցիայից դուրս եկած ՕԵԿ-ը հանրահավաք էր հրավիրել Ազատության հրապարակում՝ այս կերպ իր բողոքն արտահայտելով էլեկտրաէներգիայի թանկացմանը: Իր ելույթում ՕԵԿ նախագահ Արթուր Բաղդասարյանն անդրադարձավ նաեւ քառյակին եւ «Դեմ եմ»՝ կոչ անելով ատելությամբ եւ չարությամբ չլցվել իրենց կուսակցության նկատմամբ: