Նուբարաշենում հունիսի 1-ին 22-ամյա Վանուշ Ալեքսանյանի դանակահարության մեջ մեղադրվող Սեդրակ Օսիպյանը, որը Երեւանի փոխոստիկանապետ Վալերի Օսիպյանի եղբորորդին է, անձամբ կներկայանա ոստիկանություն, եբ դրա ժամանակը գա: Այս մասին NEWS.am-ի հետ զրույցում ասաց հունիսի 3-ից հետախուզման մեջ գտնվող Սեդրակ Օսիպյանի փաստաբան Կրոմվել Գրիգորյանը:
«Այս պահին հարցաքննությունների փուլն է, առերեսում չի եղել, հարցաքննվում են գործով անցնող մարդիկ: Ինչ վերաբերվում է Սեդրակին, ապա նրան դեռ որոնում են, սակայն ինքն անձամբ կներկայանա ոստիկանություն, երբ համապատասխան քննչական գործողություններն արվեն»,- ասաց նա:
Նշենք, որ գործով զբաղվում է Հայաստանի ոստիկանության քննչական գլխավոր վարչությունը:
Ավելի վաղ NEWS.am-ը հայտնել էր, որ դեպքը տեղի է ունեցել հունիսի 1-ի գիշերը Նուբարաշենում: Վիճաբանությունից եւ ծեծկռտուքից հետո 22-ամյա Վանուշ Ալեքսանյանին տեղափոխել էին «Էրեբունի» բժշկական կենտրոն, որտեղ վերջինս վիրահատվել էր: Ըստ ոստիկանության՝ դանակահարողը Երեւանի փոխոստիկանապետ Վալերի Օսիպյանի եղբորորդին է՝ 22-ամյա Սեդրակ Օսիպյանը: Վերջինս սակայն մեզ հետ զրույցում նշել էր, որ իր ազգականը ոչ մի կապ չունի դանակահարության հետ: