Փորձագետները պետք է մալայզիական ավիաուղիների օդանավի կործանման վայր լիարժեք մուտք ունենան: Այս մասին ՌԴ ԱԳ նախարար Սերգեյ Լավրովի հետ հեռախոսազրույցում հայտարարել է ԱՄՆ պետքարտուղար Ջոն Քերրին:
Նրա խոսքով, Միացյալ Նահանգները չափազանց մտահոգ է ողբերգության վայրում ապացույցների հնարավոր ոչնչացման մասին տեղեկությունների առնչությամբ:
Լավրովի եւ Քերրիի հեռախոսազրույցի մասին ռուսական ԱԳՆ-ի տարածած տեղեկատվության մեջ շեշտադրվում է կողմերի համաձայնությունն այն մասին, որ կործանված ինքնաթիռի բոլոր տվյալները, այդ թվում՝ ինքնագիր սարքերը, պետք է հասանելի լինեն միջազգային հետաքննության համար, եւ որ փորձագետները պետք է կործանման վայր մուտք ունենան:
ԱՄՆ պետքարտուղարության հաղորդագրությունում ասվում է, որ Քերրին Ռուսաստանից պահանջել է «անհապաղ եւ հստակ միջոցառումներ ձեռնարկել՝ Ուկրաինայում լարվածությունը նվազեցնելու ուղղությամբ»:
Այդ միջոցառումները, ԱՄՆ պետքարտուղարության կարծիքով, պետք է Ուկրաինայի արեւելքում ռուսամետ ակտիվիստներին կոչ անեն զենքը վայր դնել, ազատել բոլոր պատանդներին եւ խաղաղության շուրջ քաղաքական երկխոսություն սկսել ուկրաինական կառավարության հետ: Անհրաժեշտ է նաեւ դադարեցնել զենքի մատակարարումն ու զինյալների առաքումը Ուկրաինայի արեւելք եւ ապահովել սահման ԵԱՀԿ դիտորդների մուտքը: