Իսրայելի պաշտպանական բանակը, որը շարունակում է հարձակումը Գազայի հատվածում, բուլդոզերների օգնությամբ կործանել է նվազագույնը 10 ստորգետնյա թունել, որոնք, զինվորականների խոսքով, կիրառվում էին ՀԱՄԱՍ-ի գրոհայինների կողմից հրեական տարածք ներթափանցելու համար:
Ինչպես հայտարարել է զինվորական հրամանատարության ներկայացուցիչը, իսրայելական համազգեստներով կերպարանափոխված գրոհայիններին մեկ անգամ արդեն հաջողվել էր ներթափանցել Իսրայել եւ երկու զիինվորի սպանել: ՀԱՄԱՍ խմբավորումը հաստատել է այդ փաստը, հաղորդում է BBC-ն:
ՑԱԽԱԼ-ում ասում են, որ կանխել են Իսրայել ներթափանցման եւս մի քանի փորձ: Մի դեպքում ձերբակալել են գրոհայինների տրանկվիլիզատորներով եւ ձեռնաշղթաներով, որոնք, զինվորականների խոսքով, ծրագրում էին օգտագործել իսրայելցիներին առեւանգելու համար:
Հիշեցնենք, որ Իսրայելը հուլիսի 7-ից Գազայի հատվածում զինված գործողություն է իրականցնում, որի նպատակն է դադարեցնել պաղեստինյան հրթիռային գնդակոծությունները՝ խափանելով իսլամիստական ՀԱՄԱՍ շարժման եւ գրոհայինների այլ խմբավորումների ղեկավարող անկլավի պոտենցիալը: Հուլիսի 18-ի գիշերն Իսրայելը Գազայի հատված հետեւակային զորքեր եւ զրահատեխնիկա մտցրեց՝ անցնելով «Ամուր ժայռ» գործողության ցամաքային փուլին, որը մինչ այդ 10 օր սահմանափակվում էր օդային եւ ծովային հեռահար հարվածներով:
