Բոլոր ապացույցները ցույց են տալիս, որ մալազիական օդանավին հարվածել են ռուսամետ ակտիվիստները հրթիռային համակարգի օգնությամբ, որը գտնվել է նրանց տիրապետության տակ հուլիսի 14-ից: Նման հայտարարություն է կատարել Էստոնիայի վարչապետ Տաավի Ռիվայսը:
Նա նշել է, որ Էստոնիան, բացի հասանելի տեղեկություններից, ունի նաեւ դաշնակիցներին ներկայացրած ապացույցներ, որոնք ապացուցում են օդանավին ռուսամետ ակտիվիստների հարվածելու փաստը, ինչպես նաեւ Ռուսաստանի մասնակցությունը վթարին, հաղորդում է «Postimees»-ը:
Ռիվայսն ընդգծել է, որ ամերիկյան համակարգերը գրանցել են «երկիր-երկինք» հրթիռների արձակում աշխարհազորայինների տարածքներից անմիջապես օդանավի անհետանալուց առաջ:
«Շատ այլ ապացույցներ ցույց են տալիս, որ ինքնաթիռին հարվածել են ուկրաինական բանակի հակառակորդ ուժերը, որոնք վերջին մի քանի օրվա ընթացքում զբաղվում են ապացույցների ոչնչացմամբ»,- նշել է Ռիվայսը:
Էստոնիայի վարչապետի խոսքով՝ ողբերգական իրադարձությունը ցույց է տալիս, թե ինչի կարող է հանգեցնել ռուսամետ ակտիվիստներին ռուսական աջակցությունը:
«Մենք չէինք խոսի 300 զոհերի մասին, եթե Ուկրաինան ներքաշված չլիներ արդեն մի քանի ամիս տեւող կոնֆլիկտում, որը հրահրվել է Ռուսաստանի կողմից, նրա կողմից էլ ստանում է քաղաքական ու նյութական աջակցություն»,- նշել է Ռիվայսը:
